Të paktën dy persona kanë vdekur dhe disa kanë mbetur të plagosur në bilancin e sulmit me armë të ndodhur në një shkollë të krishterë në Wisconsin.
Ngjarja e rëndë ndodhi mëngjesin e së hënës në shkollën Abundant Life Christian School, në Madison. Sipas të përditshmes britanike “Daily Mail”, nga ajo çfarë përcjellin burimet lokale tregojnë se autori i sulmit ka vrarë veten menjëherë pas aktit makabër.
Megjithatë, ende nuk është bërë e qartë nëse ai përfshihet në numrin e viktimave, teksa policia konfirmoi se autori i të shtënave është neutralizuar.
Raportet e para thonë se sulmuesi hyri në shkollë dhe hapi zjarr. Ende nuk dihet nëse viktimat janë nxënës, pjesëtarë të stafit, apo të dyja palët.
Zona rreth shkollës, e cila ndodhet në Dane County dhe ka rreth 390 nxënës nga kopshti deri në klasën e 12-të, është aktualisht e rrethuar nga forca të shumta policore.
“Ky është një hetim aktiv dhe i vazhdueshëm,” thuhet në një deklaratë të policisë së Madison-it. “Më shumë informacione do të publikohen sapo të jenë të disponueshme. Për momentin, u kërkojmë qytetarëve të shmangin këtë zonë.”
Ngjarja ndodhi vetëm pak ditë para pushimeve të Krishtlindjeve, ndërsa nxënësit po përgatiteshin për një ndeshje basketbolli të planifikuar për mbrëmjen e së hënës.
/E.S
