Ligji i ri për pensionet, i cili ka tërhequr vëmendjen e publikut, sjell ndryshime të rëndësishme për shumë qytetarë, duke filluar nga njohja e periudhës së punës para vitit 1993. Eksperti i pensioneve, Kujtim Hoxha, ka ndarë informacione të rëndësishme mbi këtë projektligj në një intervistë për televizive, duke e vlerësuar iniciativën si një hap pozitiv, por duke theksuar nevojën për amendamente të mëtejshme. Ai ka kërkuar që të përfshihen në ligj dhe periudha e punës së individëve të moshës 14 deri në 18 vjeç, për të garantuar njohjen e kontributeve të të rinjve që kanë punuar gjatë këtyre viteve.
Përveç kësaj, Hoxha ka ndarë edhe këshilla të rëndësishme për qytetarët që kanë një librezë pune me vitet e azhurnuara, duke u sugjeruar të kërkojnë pensionin e plotë, pavarësisht nëse libreza e tyre është pasqyruar apo jo në borderotë shtetërore. Ndërkohë, një tjetër aspekt i rëndësishëm është shpërndarja e 120 milionë lekëve nga qeveria për shpërblimet që do të përfitojnë disa kategori të punonjësve të administratës, përfshirë shoferët, sanitaret, punonjësit e arkivit dhe protokollit. Këto shpërblime do të ndihmojnë në mbështetje të punonjësve që kontribuojnë në administratën shtetërore, ndërkohë që një paketë e dytë ndihme do të shpërndahet për pensionistët. Po ashtu, bëjmë me dije se në fillim të vitit 2025, qeveria do të fokusohet në ndihmën për shtresat në nevojë, duke ndarë 2.2 miliardë lekë për disa kategori sociale më vulnerabël.
Kjo përfshin familjet që trajtohen me ndihmë ekonomike, personat me aftësi të kufizuara dhe kujdestarët e tyre, të cilët do të përfitojnë një bonus prej 15,000 lekësh. Këto masa synojnë të mbështesin individët dhe familjet në përballimin e sfidave të shpenzimeve të fundvitit dhe të ofrojnë një ndihmë të drejtpërdrejtë për ata që kanë nevojë.
Reagimi i zotit Hoxha
Konkretisht eksperti i pensioneve, Kujtim Hoxha, “zbërtheu” projektligjin e ri për pensionet dhe njohjen e tyre para vitit 1993. Hoxha e vlerësoi iniciativën si pozitive, ndërsa shtoi se projektligji nuk është i plotë, për sa kohë nuk njihen kontributet e moshës 14 deri në 18 vite. Eksperti kërkoi që në diskutimet që do të zhvillohen në komisionet parlamentare të shtohet amendamenti për këtë kategori dhe njohjen e kontributeve edhe gjatë këtyre moshave.
Ndër të tjera, Hoxha shtoi se qytetarët që kanë një librezë pune me vitet e azhurnuara, duhet të kërkojnë pensionin e plotë edhe nëse libreza e tyre nuk është pasqyruar nëpër borderotë shtetërore. Hoxha njoftoi se në kategoritë që përfitojnë nga ligji i ri që pritet të miratohet në Kuvend, nuk përfshihen ushtarakët, por vetëm personat që kanë përfituar në institucionet e tjera shtetërore, para vitit 1993.
Akti normativ
Por nuk do të jenë vetëm pensionistët, ata që përfitojnë shpërblim në fundvit, por edhe disa kategori punonjësish që janë pjesë e administratës publike. Qeveria ka vendosur të shpërndajë 120 mln lekë, për shoferët, sanitaret, punonjësit e arkivit dhe punonjësit e protokollit. Rishikimi i buxhetit në zërin e shpërblimeve, vjen në një kohë, kur për pensionistët po shpërndahet bonus individual me vlerë 100 dhe 150 euro, ndërsa një paketë e dytë ndihme do të jepet edhe në pranverë.
Ministria e Financave njofton se në fillim të vitit 2025, vëmendja shkon edhe për shtresat në nevojë, me 2.2 miliardë lekë që do të ndahen për disa prej kategorive sociale më vulnerabël. Konkretisht, do të jenë përfitues të bonusit prej 15,000 lekësh të gjitha familjet që trajtohen me ndihmë ekonomike, personat me aftësi të kufizuar, si dhe kujdestarët e tyre. Shpërblimi është një masë e cila ndihmon individët dhe familjet në shpenzimet e tyre të fundvitit.
Përfituesit
Qeveria ka rishikuar buxhetin e vitit 2024 me akt normativ, ku përveç bonusit të pranverës për pensionistët ka përcaktuar edhe shpërblim për një kategori të caktuar punonjësish të administratës. Në tabelat që shoqërojnë buxhetin e këtij viti është përcaktuar një fond prej 120 milionë lekë për “Shpërblim punonjësve mbështetës të administratës publike”. Burime bëjnë të ditur se në këtë kategori do të përfshihen shoferët, sanitaret, punonjësit e arkivit dhe protokollit. Edhe pse fondi i vendosur në dispozicion është përcaktuar në rishikimin e buxhetit nuk bëhet ende e ditur shuma sesa do të përfitojnë kjo kategori punonjësish të administratës.
Por ky nuk është ndryshimi i vetëm që i është bërë buxhetit të këtij viti. Qeveria ka ulur fondin për bujqësinë dhe gjithashtu i ka dhënë një fond prej 2 mld lekë në formën e kredisë Albcontrolit, ka shtuar ndjeshëm fondet për transportin rrugor, si dhe ka caktuar 173.3 milionë lekë për 6 bashki (Divjakë, Durrës, Gjirokastër, Pukë, Shkodër e Vlorë) për “Rivitalizimin e tregjeve tradicionale”. Me këtë rishikim buxheti janë ulur ndjeshëm shpenzimet e institucioneve dhe janë hapur zëra të tjerë siç janë shpërblimet apo kredinë për Albcontrol. Edhe ky rishikim i ka dedikuar vëmendje të madhe transportit rrugor, fondet e të cilit janë rritur me 12.8 miliardë lekë. Referuar tabelave buxheti për transportin rrugor do të rritet nga rreth 29.3 miliardë lekë në 42.2 miliardë lekë.
E nga ana tjetër janë shkurtuar fondet për bujqësinë me 453 milionë lekë. Por nga ana tjetër janë shkurtuar ndjeshëm fondet për institucionet, ku ndikim ka dhënë padyshim mos realizimi i shpenzimeve përgjatë këtij viti. Nëse pritej që 95 institucione do të shpenzonin 430.9 miliardë lekë, tashmë pritshmëritë janë shkurtuar me 12 miliardë lekë, dhe deri më 31 dhjetor 2024 ato do të harxhojnë 418.9 miliardë lekë. Ky akt normativ nuk ka prekur pritshmëritë për të ardhurat dhe shpenzimet. Të ardhurat për këtë vit planifikohet të arrijnë 714 miliardë lekë, ndërsa shpenzimet në 771.3 miliardë lekë./e.t
