Presidenti amerikan, Donald Trump pranoi se përfshirja e SHBA-së në konfliktin midis Izraelit dhe Iranit është një mundësi, gjatë një interviste telefonike me televizionin amerikan, ABC News të dielën.
“Ne nuk jemi të përfshirë në të. Është e mundur që të përfshihemi. Por në këtë moment nuk jemi të përfshirë”, i tha Trump gazetares së ABC-së, Rachel Scott .
Kur u pyet nëse ka një afat kohor që Irani të ulet në tryezën e bisedimeve, presidenti tha “jo”, sipas Scott.
“Jo, nuk ka afat, por ata po flasin. Ata do të donin të bënin një marrëveshje. Ata po flasin. Ata vazhdojnë të flasin”, theksoi Trump.
Raundi i radhës i negociatave bërthamore SHBA-Iran, i planifikuar të zhvillohej në Oman të dielën, u anulua. Por Trump tha se iranianët “duan të flasin dhe do të flasin”, duke shtuar se përshkallëzimet e fundit “në fakt mund ta kenë detyruar një marrëveshje të arrihet më shpejt”.
Trump shprehu gjithashtu gatishmërinë për ta konsideruar Presidentin rus Vladimir Putin si një ndërmjetës të mundshëm në konflikt, duke vënë në dukje se Putini i kishte kontaktuar.
“Ai është gati. Më telefonoi për këtë. Patëm një bisedë të gjatë për këtë”, deklaroi presidenti. m.p.
