Hetimi për rrëzimin e avionit të Air India, i cili vrau 270 persona muajin e kaluar, po përqendrohet në veprimet e pilotëve të avionit. Sipas mediave ndërkombëtare të cilat citojnë burime të njohura me vlerësimet fillestare nga zyrtarët amerikanë, deri më tani nuk janë identifikuar probleme me Boeing 787 Dreamliner.
WSJ raporton se gjetjet paraprake tregojnë që çelësat që kontrollonin rrjedhën e karburantit në dy motorët e avionit ishin fikur, qoftë qëllimisht apo aksidentalisht. Pilotët përdorin çelësat për të ndezur motorët e avionit, për t’i fikur ose për t’i rivendosur në situata të caktuara emergjente.
Çelësat normalisht ndizen gjatë fluturimit dhe është e paqartë se si ose pse janë fikur, thanë burimet për WSJ, duke shtuar se është e paqartë nëse manovra ishte aksidentale apo e qëllimshme, apo nëse ka pasur një përpjekje për t’i ndezur përsëri. Qartësi të mëtejshme do të vijnë nga rezultatet e hetimit dhe ekzaminimi i kutisë së zezë: Byroja e Hetimit të Aksidenteve Ajrore e Indisë, e cila po udhëheq hetimin, pritet të publikojë një raport paraprak që sot, shkruan WSJ.
Nëse çelësat ishin të fikur, kjo mund të shpjegojë pse gjeneratori i emergjencës së avionit, i njohur si turbinë ajri ram (RAT), duket se është aktivizuar pak çaste para se avioni të përplasej me një konvikt studentësh mjekësie aty pranë. Në total, 270 persona vdiqën, përfshirë të gjithë personat në bord përveç njërit, i cili arriti të largohej nga rrënojat e Boeing-ut pa lëndime. /e.t
