Zv.kryeministrja Angela Rayner i ka dhënë Kinës një afat prej dy javësh për të shpjeguar pse pjesë të planit të saj për një ambasadë të re gjigante në Londër janë fshehur.
Sipas BBC-së, Ministria e Strehimit, Komuniteteve dhe Qeverisjes Vendore, e udhëhequr nga Rayner, ka dërguar një letër ku kërkon informacion shtesë dhe përgjigje deri më 20 gusht.
Rayner u kërkon konsulentëve të ambasadës kineze të shpjegojnë pse vizatimet e projektit të vendit janë bllokuar (me zona të zeza).
Kopje të kësaj letre i janë dërguar edhe Ministrisë së Brendshme dhe Ministrisë së Jashtme.
Në letër përmendet se Ministria e Brendshme ka kërkuar një “perimetër të fortë” përreth vendit të ambasadës për të parandaluar “akses të pakontrolluar të publikut”, ç’ka mund të kërkojë një aplikim të ri për leje ndërtimi.
Planet e Pekinit për ambasadën e re kanë shkaktuar shqetësime, për shkak të vendndodhjes së saj, Royal Mint Court, pranë distriktit financiar të Londrës, e cila, sipas kritikëve, mund të përbëjë rrezik për spiunazh.
Banorët gjithashtu kanë frikë për sigurinë e tyre dhe shqetësohen se objekti mund të tërheqë protesta të mëdha.
Sipas të dhënave të BBC-së, një vendim përfundimtar mbi këtë plan do të merret deri më 9 shtator.
Aktivistët pro-demokracisë nga Hong Kongu gjithashtu kanë frikë se Pekini mund ta përdorë ambasadën e madhe për të ndjekur kundërshtarët politikë, madje edhe për t’i ndaluar ata./kb
