Last Updated on 05/10/2025 by adminfjala
Në Medelín, qytetin e lindjes së Pablo Escobarit, “kultura e drogës” nuk është diçka e së kaluarës. Gazetarët e Sky News regjistrojnë një skenë të pabesueshme: një bllokim trafiku të makinave që presin të blejnë drogë, ndërsa disa kilometra larg, në brigjet e Amazonës, fermerët presin gjethe kokaine për disa dollarë, duke mbajtur një qark global miliarda dollarësh.
Qyteti që jeton në hijen e Escobarit
Medelín, dikur qendra e perandorisë më të dhunshme të drogës në botë, sot vazhdon të mbajë stigmën e emrit të Pablo Escobarit. Në çdo cep të qytetit, në postera, bluza dhe suvenire turistike, imazhi i “baronit të kokainës” ende shitet. Madje thuhet se droga ende shitet si… ushqim i shpejtë
Pra, realiteti i Medelín-it mbetet brutal. Rrugët janë transformuar në “tregje” të improvizuara droge, me motoçiklistë që rreshtohen për të marrë porositë, dhe apartamente luksoze që veprojnë si pika sekrete shpërndarjeje. “Kjo është Kolumbia”, thotë një banor.
Jeta e përditshme e “narkoshtetit”
Trafikimi në Medelín është bërë pothuajse një institucion. Transaksionet zhvillohen pranë kafeneve dhe restoranteve, në një mjedis që çuditërisht kujton jetën normale të përditshme. “Chiliadores” komunikojnë me fishkëllima: dy fishkëllima do të thotë “i pastër”, një fishkëllimë do të thotë “polici”. Tregtia operon 24 orë në ditë, me familje që darkojnë vetëm pak metra nga pikat e shitjes.
“Kultura e drogës” nuk është vetëm një aktivitet kriminal – është një mënyrë jetese. Nga lagjet e varfra deri te klubet në qendër të qytetit, prania e drogës është kudo. Tregtia e paligjshme ka depërtuar në shoqëri në një masë të tillë saqë edhe turizmi është përshtatur me të.
Kolumbia mbetet një nga prodhuesit më të mëdhenj të kokainës në botë, duke furnizuar kryesisht Shtetet e Bashkuara dhe Evropën. Administrata amerikane nën Presidentin Donald Trump e ka bërë Amerikën Latine fokusin e një “lufte të re kundër drogës”.
Trump ka nisur sulme ndaj anijeve pranë Venezuelës që ai pretendon se transportojnë drogë, ndërsa ka rritur praninë ushtarake në Karaibe me anije, helikopterë, dronë dhe ushtarë. Disa vëzhgues besojnë se kjo fushatë është një mbulesë për presionin politik dhe destabilizimin e mundshëm të regjimit të Maduros në Venezuelë, me argumentin se “qeveria vepron si një kartel”.
Kolumbia, si një vend fqinj dhe furnizuesi kryesor, është përsëri në shënjestër. Trump ka deklaruar se strategjia amerikane nuk synon përdoruesit, por furnizuesit, duke marrë parasysh se rrënja e problemit është prodhimi, jo konsumi.
Fushat e kokës në thellësitë e Amazonës
Udhëtimi i gazetarit vazhdon në brigjet e Amazonës, ku lind lënda e parë për kokainën: bima e kokës. Plantacionet janë të fshehura në zona të izoluara, kilometra larg fshatrave dhe qyteteve. Pas një udhëtimi pesë-orësh me varkë nëpër shi dhe pemë të dendura, ekipi i Sky News arrin në një plantacion tetë hektarësh pranë kufirit kolumbiano-peruan.
Bima është dy vjeç e gjysmë dhe fermerët po përgatiten për korrje. Duhen rreth 30 kilogramë gjethe kokaine për të prodhuar vetëm 70 gramë kokainë. Megjithatë, fermeri që e rrit bimën paguhet vetëm 7 dollarë për të gjitha këto.
Cikli vicioz i varfërisë dhe ilegalitetit
Fermeri e di që kultura përdoret për përpunim të paligjshëm, por nuk ka zgjidhje tjetër. “Për mua është çështje mbijetese,” thotë ai. “Nuk është mirë për askënd, ne e dimë këtë, por të gjithë bëjmë sakrifica për të jetuar.”
Realiteti është i ashpër: ndërsa kartelet fitojnë miliarda, njerëzit që punojnë në fushat e kokës mbeten të bllokuar në varfëri. Komunitete të tëra mbijetojnë me kultivim të paligjshëm, pa asnjë alternativë tjetër.
Nga gjethet e kokës te ari i bardhë i Perëndimit
Tregtia ndërkombëtare e kokainës fillon nga këto gjethe të thjeshta dhe përfundon në dhomat e ndenjes së Perëndimit. Pavarësisht fushatave qeveritare dhe luftërave kundër karteleve, kërkesa globale mbetet e qëndrueshme – dhe kjo është ajo që e mban gjallë zinxhirin.
Pavarësisht përpjekjeve për t’u modernizuar dhe zhvilluar, Medelín mbetet pasqyra e kësaj kontradikte: një qytet që jeton midis mitit të Escobarit dhe realitetit të ashpër të një shteti që është ende i varur shoqërisht dhe ekonomikisht nga droga./e.t