Presidenti Donald Trump ka shkaktuar kaos në prag të Kupës së Botës 2026 pas dy kërcënimeve të mëdha vetëm disa muaj para nisjes së turneut.
Shtetet e Bashkuara do ta bashkë-organizojnë kompeticionin me Kanadanë dhe Meksikën, në edicionin e parë që përfshin 48 ekipe, nga 32 sa ka qenë tradicionalisht, dhe FIFA ka konfirmuar se do të ketë mbi gjashtë milionë bileta në dispozicion për ndeshjet e verës së ardhshme.
Megjithatë, përgatitjet janë trazuar pasi Trump ka kërcënuar se mund t’u heqë qyteteve të caktuara të drejtën e organizimit.
Muajin e kaluar ai deklaroi se kishte autoritetin të merrte ndeshjet e Kupës së Botës nga Boston nëse qyteti nuk konsiderohej i sigurt, ndërsa të hënën në mbrëmje, pranë presidentit të FIFA-s, Gianni Infantino, ai bëri të njëjtin paralajmërim për Seattle, duke theksuar se nëse niveli i krimit nuk përmirësohet, mund të hiqeshin të drejtat e organizimit të qytetit.
Brenda Zyrës Ovale, Trump njoftoi gjithashtu se ambasadat amerikane do t’u japin prioritet në caktimin e takimeve për vizë tifozëve që posedojnë bileta për Kupën e Botës.
Megjithëse posedimi i biletës nuk garanton automatikisht vizën, sistemi FIFA Prioritised Appointment Scheduling System (PASS) është krijuar për të përshpejtuar procesin, dhe Sekretari i Shtetit, Marco Rubio, deklaroi se aplikuesit e huaj mund të sigurojnë një intervistë brenda gjashtë deri në tetë javësh nga momenti i aplikimit.
Edicioni i verës së ardhshme do të jetë historik, jo vetëm për numrin rekord të ekipeve, por edhe për faktin që SHBA, Kanadaja dhe Meksika do ta organizojnë për herë të parë së bashku, ndërsa kombëtare si Spanja, Anglia, Franca dhe Argjentina pritet të konkurrojnë për trofeun. m.p.