Më 8 dhjetor 1990, studentët e Universitetit të Tiranës ngritën zërin kundër regjimit komunist, duke shkruar një kapitull të ri në historinë e Shqipërisë. Në “Qytetin Studenti”, për herë të parë pas 46 vitesh nën regjimin totalitar, studentët dolën në protestë për të kërkuar ndryshim. Fillimisht, ata bojkotuan mësimin dhe protestuan për kushtet e vështira ekonomike dhe jetesën e papërshtatshme në konvikte.
Protesta mori përmasa të reja kur forcat policore dhe ushtarake përdorën dhunë për të shpërndarë turmat. Incidenti vetëm sa e forcoi vendosmërinë e studentëve, duke i shtyrë ata të kërkojnë jo vetëm përmirësimin e kushteve, por edhe ndryshime të thella politike, si lejimin e pluralizmit dhe garantimin e të drejtave themelore. Me moton “E duam Shqipërinë si gjithë Europa”, ata kërkuan një shtet të së drejtës, integrim evropian dhe një shoqëri demokratike.
Kjo lëvizje studentore u bë katalizatori i rënies së komunizmit në Shqipëri, duke i dhënë fund epokës së izolimit dhe duke hapur rrugën për ekonomi të tregut dhe një shoqëri të lirë. Në vitin 2009, Kuvendi i Shqipërisë e shpalli 8 Dhjetorin si Ditën Kombëtare të Rinisë, për të nderuar guximin e studentëve dhe rëndësinë historike të lëvizjes së tyre.
8 Dhjetori mbetet sot një simbol i frymës së re, guximit dhe dëshirës për një Shqipëri demokratike./E.Ç
