Organizata Botërore e Shëndetësisë (OBSH) publikoi sot gjetje të reja mbi mungesën alarmante të ndërgjegjësimit për lidhjen midis alkoolit dhe kancerit në Evropë dhe bëri thirrje për paralajmërime të ngjashme me ato për produktet e duhanit, në rajonin me shkallën më të lartë të konsumit të alkoolit në botë.
Organizata ka paralajmëruar vazhdimisht se alkooli shkakton kancer dhe ka mbështetur etiketimin e qartë të produktit, por ajo kurrë nuk ka dhënë udhëzime kaq të qarta në thirrjet e saj për rregullore të reja.
Kreu i shërbimit shëndetësor publik të SHBA-së në fillim të këtij viti bëri thirrje gjithashtu që paralajmërimet për rreziqet e kancerit të shtohen në etiketat e pijeve alkoolike.
Alkooli shkakton 800 mijë vdekje në të gjithë Evropën çdo vit, por vetëm një pjesë e vogël e popullsisë është e vetëdijshme për rreziqet, tha zyra evropiane e OBSH-së.
Hulumtimi i tyre zbuloi se vetëm 15 për qind e të anketuarve e dinin se alkooli mund të çojë në kancer të gjirit dhe 39 për qind ishin të vetëdijshëm për lidhjen midis alkoolit dhe kancerit të zorrës së trashë.
“Pavarësisht se kanceri është shkaku kryesor i vdekjeve që i atribuohen alkoolit në Bashkimin Evropian, ndërgjegjësimi i publikut për lidhjen midis alkoolit dhe kancerit mbetet jashtëzakonisht i ulët,” tha OBSH.
Mbështetja në vetë-rregullimin mbart rrezikun që prodhuesit e alkoolit të vendosin mesazhe të paqarta në vende që nuk bien në sy ose të përdorin kode QR që konsumatorët shpesh i injorojnë, shtoi OBSH.
Në vend të kësaj, pijet alkoolike duhet të kenë paralajmërime të qarta dhe të spikatura shëndetësore me shkrim që mund të kombinohen me imazhe për të maksimizuar shtrirjen dhe për të fuqizuar konsumatorët me informacion të qartë dhe të saktë. Në këtë mënyrë ata mund të marrin vendime të informuara për shëndetin e tyre, tha OBSH.
Simbolet ose mesazhet e thjeshta me tekst mund të jenë po aq efektive sa fotot më të qarta, tha zëdhënësi kur u pyet për llojet e paralajmërimeve.
Aktualisht, vetëm tre nga 27 vendet anëtare të BE-së, Franca, Lituania dhe Gjermania, kanë një lloj etikete paralajmëruese. Irlanda synon të prezantojë paralajmërime më të gjera për kancerin në pijet alkoolike nga maji 2026./e.t
