Në fund të vitit të shkuar, Australia miratoi një ligj që ndalon rrjetet sociale për personat nën 16 vjeç. Tani Meta, TikTok dhe Snapchat s’janë shumë të lumtura që është bërë një përjashtim: YouTube.
Australia e ka cilësuar platformën si një mjet i rëndësishëm edukimi dhe e lejon përdorimin, pavarësisht hamendësimeve se do të përfshihej edhe Youtube.
Muajin e kaluar, raporti i Komisionerit të Sigurisë Elektronike në Australi, rezultoi se YouTube është platforma më e përdorur nga 13-15 vjeçarët. Çdokush që është nën 16 vjeç duhet të jetë pjesë e një llogarie familjare që ka të drejta të vëzhgimit prindëror për ta përdorur.
“S’është logjike të ndalohen dy platforma duke përjashtuar të tretën”, u shpreh drejtoresha e politikave publike të TikTok në Australi. Ndërkohë Meta është shprehur se qeveria australiane nuk është transparente dhe përbën “një tallje për qëllimin e shprehur të qeverisë për mbrojtjen e të miturve kur u miratua ligji”.
Snapchat ndoqi linjën e këtyre kompanive duke deklaruar: “Duhet të ketë një aplikim të drejtë dhe të paanshëm të përjashtimeve dhe të gjitha shërbimet duhet të ofrohen në të njëjtin standard”. Njëkohësisht, Snap thotë se është një shërbim për dërgimin e mesazheve dhe s’duhet të ndalohet.
Ligji i Australisë për ndalimin e rrjeteve sociale për personat nën 16 vjeç duhet të hyjë në fuqi në fund të këtij viti. Koha do të tregojë nëse zemërimi i kompanive të mëdha do të ndikojë në ndryshimin e qasjes për YouTube./ S,M
