Pas 11 majit, qeveria do të nisë punën për ngritjen e një komisioni të posaçëm anti-korrupsion, i drejtuar nga Fatmir Xhafaj. Opozita e ka refuzuar, ndërsa institucionet e drejtësisë nuk kanë dërguar përfaqësues. Kryeministri Edi Rama e mbrojti këtë nismë si një hap drejt BE-së. “Myslimanët i falen Allahut 5 herë në ditë, ne i falemi BE-së më shumë se 5 herë,” tha ai. Ky komision shihet si një strukturë paralele me SPAK-un. Socialistët pretendojnë se do ndihmojë drejtësinë, ndërsa kritikët e shohin si manovër politike.
Qeveria po ecën përpara me ngritjen e një komisioni të posaçëm për drejtësinë, pavarësisht refuzimit të opozitës dhe distancimit të institucioneve të drejtësisë. Në tryezën e dytë të nivelit të lartë të organizuar nga komisioni i posaçëm parlamentar për anti-korrupsionin, u tha qartë se pas zgjedhjeve parlamentare, do të prezantohet plani për ndërhyrjet në ligjet e reformës në drejtësi. Kryeministri Edi Rama e cilësoi këtë nismë si një hap drejt standardeve europiane, ndërsa bëri një krahasim të pazakontë mes besimtarëve myslimanë dhe përpjekjeve të tij për integrimin e Shqipërisë në BE. “Myslimanët i falen Allahut 5 herë në ditë, ndërsa ne i falemi Bashkimit Europian më shumë se 5 herë në ditë,”deklaroi Rama, duke nënkuptuar përkushtimin e tij të palëkundur për këtë proces. Pavarësisht mbështetjes së socialistëve, Komisioni i Posaçëm Anti-Korrupsion, drejtuar nga Fatmir Xhafaj, është bojkotuar nga opozita dhe nuk ka marrë as mbështetjen e institucioneve të drejtësisë, të cilat nuk kanë pranuar të dërgojnë përfaqësuesit e tyre. Kjo mungesë përfshirjeje e ka vënë në pikëpyetje legjitimitetin e tij, duke e bërë të duket më shumë si një lëvizje politike sesa si një mekanizëm real reformues. Xhafaj gjatë takimit tha se: “Sundimi i ligjit nuk mund të kuptohet pa drejtësinë dhe institucionet e saj. Gjykuam më të arsyeshme që prezantimin e planit analitik dhe procesin e konsultimit ta zhvillonim pas zgjedhjeve, duke shpresuar për një klimë më të qetë politike.” Pavarësisht këtij arsyetimi, mbetet e paqartë se si ky komision mund të ndikojë realisht në sistemin e drejtësisë, përderisa ai është i izoluar nga aktorët kryesorë të drejtësisë dhe nga opozita. Rama u përpoq të largonte dyshimet duke theksuar se iniciativa nuk është një ndërhyrje e qeverisë në drejtësi, por një proces që zhvillohet brenda parlamentit. “Nuk mund të jetë kjo hapësirë ndërveprimi një hapësirë që e krijon qeveria. U vërtetua nga koha që komisioni krijoi një momentum angazhimi gjithëpërfshirës shumë përtej mureve të institucioneve,” tha ai. Por skeptikët e shohin këtë komision si një tentativë për të kontrolluar narrativën mbi drejtësinë dhe për të ndërtuar një strukturë paralele që mund të minojë pavarësinë e SPAK-ut dhe institucioneve të tjera të reja të drejtësisë. Në një kohë kur lufta kundër korrupsionit është një nga kushtet kryesore për hapjen e negociatave të plota me BE-në, ngritja e këtij komisioni paralel ka shkaktuar pikëpyetje mbi qëllimet e vërteta të qeverisë dhe mbi ndikimin që mund të ketë në ecurinë e reformës në drejtësi.
