Një 38-vjeçar i cili i premtoi një personi dhënien e një shume parash, për t’i blerë votën në interes të Partisë Demokratike është vendosur në pranga nga policia e Lushnjës.
Marin Leka akuzohet për korrupsion dhe marrje e përdorim të paligjshëm të dokumentit të identifikimit.
Sekuestrohet karta e identitetit e shtetasit që i ishin premtuar paratë.
Njoftimi i policisë:
Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin M. L., 38 vjeç, banues në Lushnjë, për veprat penale “Korrupsioni aktiv në zgjedhje” dhe “Marrja dhe përdorimi i paligjshëm i dokumentit të identifikimit”.
Nga hetimet e kryera në bashkëpunim me Prokurorinë e Fierit, dyshohet se shtetasi M. L. i ka marrë një shtetasi, kartën e identitetit, si dhe i ka premtuar dhënien e një shume parash, dyshohet me qëllim blerjen e votës në favor të një subjekti politik, pjesëmarrës në zgjedhjet parlamentare të datës 11.05.2025.
Materialet procedurale i kaluan Prokurorisë kundër Korrupsionit dhe Krimit të Organizuar, për veprime të mëtejshme./e.t
