Simptomat më të zakonshme të një infarkti të miokardit përfshijnë dhimbjen e fortë në gjoks, e cila mund të përhapet në krahun e majtë, shpinë ose qafë. Por, ka edhe simptoma më pak tipike që mund të jenë të ngatërruara, si dhimbja në shpatulla, nofulla, stomak, ose vështirësitë në frymëmarrje.
Këto simptoma, veçanërisht kur ndodhin gjatë aktivitetit fizik dhe zbehen me pushimin, janë shenja se diçka nuk shkon me zemrën dhe kërkojnë vlerësim mjekësor të menjëhershëm.
Rreziku i infarktit të miokardit është shumë më i lartë tek ata që kanë faktorë rreziku si duhanpirja, hipertensioni, diabeti dhe nivelet e larta të kolesterolit. Këto kushte dëmtojnë enët e gjakut dhe rrisin mundësinë e formimit të pllakave aterosklerotike që mund të bllokojnë arteriet koronare, duke shkaktuar sulm në zemër.
Një nga aspektet më të rëndësishme në trajtimin e infarktit të miokardit është dërgimi i pacientit në një qendër të specializuar menjëherë pas diagnostikimit. Në spitalet moderne, angioplastika (ndërhyrja me tullumbace) është trajtimi kryesor që ndihmon për të rikthyer qarkullimin e gjakut dhe për të minimizuar dëmtimin e mëtejshëm të zemrës.
Pas një sulmi të zemrës, pacientët duhet të ndjekin një trajtim të rreptë dhe një monitorim të vazhdueshëm për të kontrolluar funksionin e zemrës dhe për të menaxhuar faktorët e tjerë rreziku. Analizat si stres EKO dhe koronarografi janë të domosdoshme për të monitoruar dhe korrigjuar çdo problem të mbetur.
Infarkti i miokardit është shkaku kryesor i vdekjeve në vendet e zhvilluara. Prandaj, parandalimi është i një rëndësie të madhe. Lënia e duhanit, ushqimi i shëndetshëm, stërvitja e rregullt dhe kontrollimi i nivelit të kolesterolit dhe presionit të gjakut mund të ndihmojnë ndjeshëm në zvogëlimin e rrezikut të sulmeve në zemër.
Nëse ndodhin simptoma të dyshimta, kërkoni kujdes mjekësor sa më shpejt. Mjekët mund të ndërhyjnë me trajtime që mund të shpëtojnë jetën dhe të përmirësojnë cilësinë e jetës pas një infarkti./k.k
