Deputeti i sapozgjedhur i Partisë Socialiste për zonën e Delvinës, Ardit Bido, ka reaguar për situatën pas zjarrit të madh në fshatin Kopaçez, ku falë ndërhyrjes në kohë u shmang një tragjedi njerëzore.
Në një përditësim të shpërndarë në rrjetet sociale, Bido deklaroi se puna në terren po vijon intensivisht dhe se energjia elektrike është rikthyer në zonë. Ndërkohë, po punohet për të riparuar dëmet në rrjetin e ujësjellësit që ka lënë tre fshatra pa furnizim me ujë të pijshëm.
“S’ka më justifikime: vigjilencë totale dhe çdo dorë do ta ndjejë ligjin!”, theksoi Bido, duke paralajmëruar masa të forta për autorët e zjarreve të qëllimshme.
Ai bëri të ditur se, në bashkëpunim me Ministrinë e Bujqësisë, po punohet për të ndihmuar blegtorët që janë prekur nga djegia e kullotave, duke u përballur me mungesë ushqimi për bagëtitë dhe gjedhët.
Bido bëri thirrje për vigjilencë maksimale, sidomos në ditët e nxehta, dhe ftoi qytetarët që të njoftojnë autoritetet për çdo rast të dyshimtë, në mënyrë që të parandalohet çdo vatër e re zjarri dhe të shmangen pasojat e rënda./e.t
