Last Updated on 24/09/2025 by adminfjala
Pas një jave pezullimi, Jimmy Kimmel do të rikthehet me emisionin e tij “Jimmy Kimmel Live!” të martën, konfirmoi të hënën kompania The Walt Disney Company.
“Javën e kaluar vendosëm të pezullojmë prodhimin për të shmangur përshkallëzimin e një situate të tensionuar në një moment emocional për vendin tonë,” tha Disney në një deklaratë zyrtare. “Komentet e bëra ishin të pakohshme dhe të pandjeshme.”
Kimmel u përball me kritika të ashpra pasi, në një monolog të 11 shtatorit, ai komentoi mbi vrasjen e aktivistit konservator Charlie Kirk, duke ironizuar si reagimin e politikanëve republikanë, ashtu edhe të ish-presidentit Donald Trump.
“Banda MAGA po përpiqet ta paraqesë këtë djalin që vrau Charlie Kirk si diçka tjetër nga ata,” tha Kimmel në monolog.
“Trump është në fazën e katërt të zisë: ndërtimi,”shtoi ai, duke bërë humor mbi faktin që ish-presidenti foli për rinovime në Shtëpinë e Bardhë në vend që të komentohej për vrasjen e Kirk.
Komentet shkaktuan reagime të forta nga zyrtarë si Komisioneri i FCC, Brendan Carr, i cili kërcënoi me një hetim zyrtar. Disa rrjete televizive, përfshirë Nexstar Media dhe Sinclair Broadcast Group, pezulluan transmetimin e emisionit.
Pavarësisht rikthimit të emisionit në ABC, Sinclair deklaroi se do të vazhdojë ta zëvendësojë programin me edicione lajmesh, duke thënë se diskutimet me rrjetin janë ende në zhvillim.
Ndërkohë, personalitete të shumta të showbiz-it kanë dalë në mbështetje të Kimmel, përfshirë Howard Stern, Jennifer Aniston, dhe Ben Affleck, të cilët e quajtën pezullimin “moment i errët për lirinë e fjalës.”
Donald Trump e festoi pezullimin në rrjetin e tij Truth Social, duke e quajtur atë “lajm të madh për Amerikën”.
Sipas Daily Mail, burime pranë prezantuesit thonë se Kimmel është i tërbuar me vendimin dhe po shqyrton mënyra për të dalë nga kontrata e tij me ABC.
“Jimmy është shumë i mërzitur dhe nuk do ta kalojë këtë pa reaguar,” tha një burim. “Ai nuk ka qenë i lumtur me rrjetin prej kohësh.”/kb