Fitorja e Zohran Mamdanit në zgjedhjet për kryebashkiak të New York-ut padyshim do të shkaktojë reagim të ashpër te presidenti amerikan Donald Trump, i cili e ka cilësuar Mamdanin si “komunist” dhe ka kërcënuar të ndalojë fondet federale për qytetin më të madh të SHBA-ve në rast se 34-vjeçari do fitonte.
Në një postim në platformën e tij TruthSocial, Trump ka shkruar më herët se nëse Mamdani fiton, “shumë pak, përveç minimumit të detyrueshëm, do të kontribuojë me fonde federale për qytetin e tij të dashur”, duke argumentuar se një kryebashkiak socialist do të shkaktojë në qytet “një katastrofë ekonomike dhe sociale totale”.
Trump dhe republikanë të tjerë e kanë quajtur Mamdanin “komunist”, por vetë Mamdani, e përshkruan veten si socialist demokrat.
Fushata e tij ka qenë e fokusuar në bërjen e New York-ut më të përballueshëm për qytetarët, me masa si ngrirja e qirave, kujdesi falas për fëmijët dhe ulja e kostove të transportit publik.
Ligji amerikan thotë se Kongresi, jo presidenti, ka autoritetin për të ndarë fondet federale.
Nëse presidenti nuk ekzekuton vendimet e Kongresit, ky konsiderohet një akt i paligjshëm i bllokimit të fondeve. Sipas Ligjit për Kontrollin dhe Bllokimin e Fondeve, i vitit 1974, presidenti mund të mbajë “pezull” fondet për 45 ditë, por më pas duhet të marrë miratimin e Kongresit.
Avokati Bruce Fein ka deklaruar për Al Jazeera se ligjërisht Trump nuk mund të ndalojë fondet për asnjë shtet për shkak të përkatësisë politike të guvernatorit. Çdo entitet i prekshëm nga një veprim i tillë mund të padisë administratën.
Si përfundim, pavarësisht kërcënimeve të Trump, ligji dhe Kongresi e kufizojnë fuqinë e tij për të ndaluar fondet federale, ndërsa qyteti i New York-ut vazhdon të jetë i varur pjesërisht nga mbështetja federale, veçanërisht për shërbime sociale dhe strehim./kb