Një aksident tragjik hekurudhor është shënuar mëngjesin e së martës në veri të France, ku një tren i shpejtësisë së lartë është përplasur me një kamion që transportonte pajisje ushtarake.
Ngjarja ndodhi rreth orës 07:00 pranë zonës mes Bully-les-Mines dhe Mazingarbe, në rajonin Pas-de-Calais. Sipas autoriteteve lokale, treni i tipit TGV, që udhëtonte nga Dunkirk drejt Paris, u përplas me një autokolonë rrugore që transportonte një urë ushtarake të lëvizshme.
Në momentin e përplasjes, treni po lëvizte me një shpejtësi rreth 160 km/h dhe vijoi për disa qindra metra para se të ndalonte. Si pasojë e goditjes, drejtuesi i trenit humbi jetën, ndërsa disa pasagjerë mbetën të plagosur.
Autoritetet bëjnë të ditur se në bord ndodheshin 246 pasagjerë dhe dy anëtarë të stafit, të cilët u evakuuan menjëherë dhe u strehuan në zona të afërta. Dy prej të plagosurve janë në gjendje më të rëndë, por jashtë rrezikut për jetën.
Prokuroria lokale ka nisur një hetim për të zbardhur shkaqet e aksidentit, ndërsa drejtuesi i kamionit është shoqëruar në polici. Hetimet po fokusohen në rrethanat e kalimit në vendkalimin hekurudhor dhe funksionimin e pajisjeve të sigurisë.
Ndërkohë, kompania hekurudhore SNCF njoftoi pezullimin e qarkullimit të trenave në këtë linjë, duke paralajmëruar ndërprerje dhe vonesa të shumta gjatë gjithë ditës./MXH