Last Updated on 11/05/2026 by EL
Shoqata e Pajtimit Kombëtar “BENË” ka dalë me një deklaratë zyrtare ku shpreh mbështetjen e plotë për anëtarët e Organizatës së Muxhahedinëve të Popullit të Iranit (MEK), të cilët janë vendosur në kompleksin Ashraf 3 në zonën e Manzës, Durrës.
Në njoftimin e tyre, shoqata vlerëson lart integrimin e këtij komuniteti dhe marrëdhëniet e ngushta që ata kanë krijuar me banorët vendas.
Sipas dokumentit, përfaqësuesit e shoqatës kanë qenë në kontakt të vazhdueshëm me iranianët e strehuar në Shqipëri, duke i përshkruar ata si njerëz “paqedashës dhe të kulturuar” që i kanë kushtuar jetën e tyre lirisë.
“Banorët e zonës së Manzës i konsiderojnë Muxhahedinët e Ashraf 3 si pjesë të familjes së tyre,” thuhet në deklaratë, duke theksuar se kompleksi është ndërtuar me shpenzimet e vetë komunitetit iranian.
Shoqata “BENË” ngre shqetësimin se regjimi aktual në Iran po investon shuma të mëdha parash dhe po përdor propagandë për të dëmtuar imazhin e MEK-ut në Shqipëri.
Deklarata nënvizon historinë e vështirë të anëtarëve të kësaj organizate:
Përballje me dy diktatura (atë mbretërore dhe atë fetare).
Pothuajse 1,000 prej tyre kanë qenë të burgosur politikë dhe dëshmitarë të masakrave e torturave në Iran.
Ata gëzojnë mbështetjen e organizatave ndërkombëtare për të drejtat e njeriut.
Në mbyllje të mesazhit, shoqata rikonfirmon mbështetjen për përpjekjet e Muxhahedinëve të Popullit për të arritur një Iran të lirë dhe demokratik. Dokumenti mban vulën zyrtare të shoqatës me seli në Tiranë dhe nënshkrimin e drejtuesve të saj, duke e cilësuar derën e Ashraf 3 si “gjithmonë të hapur për të gjithë njerëzit e Shqipërisë.”/ET
