Kremlini deklaroi të martën se zhvillimet në procesin e paqes tregojnë se lufta në Ukrainë po i afrohet fundit, pas komenteve të presidentit rus, Vladimir Putin, se konflikti “po shkon drejt përfundimit”.
Zëdhënësi i Kremlinit, Dmitry Peskov, tha se Rusia mbetet e hapur për kontakte dhe mirëpret vazhdimin e përpjekjeve ndërmjetësuese të Shteteve të Bashkuara.
Sipas Peskovit, puna e bërë deri tani në formatin trepalësh dhe hapat e ndërmarra në procesin e paqes krijojnë bazën për të besuar se përfundimi i konfliktit po afrohet, megjithëse ai theksoi se ende është herët për të folur për detaje konkrete.
Ai deklaroi gjithashtu se armëpushimi humanitar tashmë ka përfunduar dhe se operacioni ushtarak rus në Ukrainë vazhdon.
Peskov përsëriti qëndrimin e Moskës se lufta mund të ndalet në çdo moment, nëse autoritetet ukrainase dhe presidenti Volodymyr Zelenskyy marrin, sipas tij, “vendimet e nevojshme”, për të cilat tha se janë të njohura nga Kievi.
Deklaratat e Kremlinit vijnë në një kohë kur përpjekjet diplomatike për arritjen e një marrëveshjeje paqeje mes Rusisë dhe Ukrainës mbeten në fokus të komunitetit ndërkombëtar, ndërsa Shtetet e Bashkuara vazhdojnë përpjekjet për ndërmjetësim në konflikt./mxh