Të burgosurit organizuan të dielën një protestë në çatinë e burgut “Barinas” në Venezuelë, duke grumbulluar dyshekë të cilët i dogjën dhe kërkuan shkarkimin e drejtorit të institucionit. Ata kanë hedhur akuza për dhunë nga rojet e burgut.
“Ne duam drejtësi. Po na qëllojnë ne, rojet”, tha një i burgosur në një video të ndarë nga Observatori Venezuelian i Burgjeve, në X, në të cilën shihet një burrë me një plagë plumbi në gjoks.
Të burgosurit thanë se po protestonin kur stafi i burgut hapi zjarr dhe la disa të plagosur. Tym i madh u krijua nga dyshekët dhe çarçafët që digjeshin ndërsa të burgosurit brohoritën “Mjaft me tortura!”.
Ata varën edhe një mbishkrim “SOS”. Të burgosurit kërkuan shkarkimin e drejtorit të burgut në videot e shpërndara nga observatori. Ata thanë se rrobat e tyre ishin marrë dhe u ishte ndaluar të pranonin vizita.
Anëtarët e familjeve të të burgosurve u përleshën jashtë me oficerët e Gardës Kombëtare, të armatosur me mburoja kundër trazirave, ndërsa ata u përpoqën pa sukses t’i ndalonin ata të hynin në burg. Ata i thanë Observatorit Venezuelian të Burgjeve se dëgjuan britma dhe shpërthime disa minuta më vonë.
Observatori Venezuelian i Burgjeve tha se po dokumentonte ngjarjet dhe po i raportonte ato tek organet mbikëqyrëse të të drejtave të njeriut. Ai tha se rreth 1,200 burra dhe më shumë se 100 gra të burgosura në burg i ishin bashkuar grevës./A.D