Last Updated on 22/06/2026 by EL
Një spital në Mbretërinë e Bashkuar ka shpallur gjendje kritike dhe ka kufizuar shërbimet vetëm për rastet që rrezikojnë jetën, pasi po përballet me një rritje të ndjeshme të kërkesave për ndihmë mjekësore të shkaktuar nga vala ekstreme e të nxehtit. East Surrey Hospital njoftoi të hënën se departamenti i urgjencës do të mbetet i hapur, por do të trajtojë vetëm pacientët me gjendje kërcënuese për jetën. “Ju lutemi paraqituni në East Surrey Hospital vetëm në rast emergjencash që rrezikojnë jetën”, deklaroi Ed Cetti, drejtor mjekësor i Surrey and Sussex Healthcare NHS Trust. Pacientët me probleme jo urgjente po orientohen drejt farmacive, mjekëve të familjes dhe qendrave shëndetësore ambulatore për të marrë këshilla dhe trajtim. Sipas autoriteteve shëndetësore, masa u mor për të garantuar që pacientët të vazhdojnë të marrin kujdes të sigurt dhe cilësor pavarësisht presionit të madh mbi sistemin.
Temperaturat në jug të Anglisë pritet të arrijnë deri në 34°C, ndërsa Agjencia Britanike e Sigurisë Shëndetësore (UKHSA) ka lëshuar alarm të kuq për gjashtë rajone të Anglisë. “Një alarm i kuq për temperaturat e larta tregon se ekziston rrezik për jetën edhe për personat e shëndetshëm. Veprime të thjeshta si hidratimi i vazhdueshëm, shmangia e diellit gjatë orëve më të nxehta dhe mbajtja e ambienteve të freskëta mund të bëjnë një ndryshim të madh”, tha Agostinho Sousa, drejtues për ngjarjet ekstreme dhe mbrojtjen e shëndetit në UKHSA. Vala e të nxehtit po prek edhe vende të tjera evropiane, përfshirë Spanjën, Francën, Belgjikën, Holandën, Italinë, Zvicrën dhe Gjermaninë, duke ushtruar presion mbi shërbimet shëndetësore. Në Francë, shërbimet e urgjencës në departamentin Landes, në jugperëndim të vendit, raportuan të dielën një rritje prej 20% të thirrjeve emergjente krahasuar me nivelet normale, sipas autoriteteve lokale./FC