Last Updated on 23/08/2026 by Kesjana
**
Presidentja e Bankës Qendrore Evropiane, Christine Lagarde, mund të marrë drejtimin e Forumit Ekonomik Botëror në vitin 2027. Sipas raportimeve nga Zvicra, emri i Lagarde është diskutuar si një nga kandidaturat e mundshme për të drejtuar organizatën gjatë një mbledhjeje të bordit pranë Gjenevës. Lagarde, e cila është pjesë e Bordit të Administrimit të Forumit Ekonomik Botëror, thuhet se ka falënderuar anëtarët për besimin dhe ka shprehur gatishmërinë për të marrë përsipër detyrën.
Procesi i zgjedhjes së drejtuesit të ardhshëm është ende në zhvillim dhe nuk është marrë një vendim përfundimtar për kohën kur Lagarde mund të marrë drejtimin e organizatës. Aktualisht, Forumi Ekonomik Botëror drejtohet nga bashkëkryetarët Larry Fink, drejtuesi i BlackRock, dhe André Hoffmann, nënkryetar i kompanisë Roche. Ata pritet të vazhdojnë të drejtojnë organizatën edhe gjatë takimit të përvitshëm të Davosit, që do të zhvillohet në janar.
Lagarde drejton Bankën Qendrore Evropiane që prej vitit 2019 dhe mandati i saj tetëvjeçar përfundon në tetor 2027. Në muajt e fundit janë shtuar spekulimet për të ardhmen e saj pas largimit nga BQE, përfshirë mundësinë e përfshirjes në politikën franceze. Megjithatë, Lagarde ka mohuar se synon të kandidojë për presidente të Francës, duke theksuar se nuk është kandidate për ndonjë post politik.
Nëse emërimi i saj në krye të Forumit Ekonomik Botëror konfirmohet, Lagarde do të marrë drejtimin e një prej institucioneve më të rëndësishme globale për dialogun ekonomik dhe politik. Forumi organizon çdo vit takimin e Davosit, ku mblidhen liderë politikë, drejtues kompanish dhe figura të rëndësishme nga ekonomia dhe financat botërore./FC