A do t’i besonit një shërbimi të vetëm digjital, të mbështetur nga Bashkimi Europian, për të ruajtur të gjitha informacionet tuaja ligjore, profesionale dhe mjekësore? Portofoli i Identitetit Digjital të BE-së (EUDI Wallet) synon të thjeshtojë procedurat administrative, duke u mundësuar qytetarëve të ruajnë dokumentet e tyre në një sistem të vetëm, i cili funksionon në të gjitha vendet anëtare.
Sot, zhvendosja, puna ose studimi në një vend tjetër të BE-së mund të kërkojë përdorimin e sistemeve të ndryshme kombëtare dhe përballjen me një sasi të madhe dokumentesh. Për këtë arsye, BE-ja ka krijuar Portofolin e Identitetit Digjital të BE-së, një aplikacion celular të mbështetur nga qeveritë, i cili do t’u mundësojë individëve dhe bizneseve të provojnë identitetin e tyre online dhe fizikisht në të gjithë Bashkimin Europian.
Qëllimi është që shërbimet ndërkufitare të jenë më të lehta për t’u përdorur.
Portofoli është krijuar për të ruajtur të gjitha kredencialet zyrtare digjitale në një vend të vetëm. Këto mund të përfshijnë kartën kombëtare të identitetit, lejen e drejtimit, recetat mjekësore dhe diplomat universitare.
Ai mund të përdoret gjithashtu për nënshkrime elektronike, mënyra pagese dhe certifikata biznesi. Procedura të tilla si hapja e një llogarie bankare, marrja me qira e një makine ose regjistrimi në një universitet jashtë vendit pritet të bëhen më të thjeshta për t’u kryer në mënyrë digjitale.
Çdo shtet anëtar do të ofrojë portofolin e tij, të ndërtuar sipas standardeve të përbashkëta europiane, në mënyrë që versionet e ndryshme kombëtare të mund të funksionojnë përtej kufijve.
Çdo vend i BE-së duhet të vërë në dispozicion të paktën një portofol të certifikuar deri në dhjetor të vitit 2026.
Projekti ka ngritur gjithashtu shqetësime. Grupet që merren me privatësinë dhe të drejtat civile kanë vënë në pikëpyetje nëse vendosja e të gjithë informacionit të identitetit në një sistem të vetëm mund të rrisë rrezikun e sulmeve kibernetike, mbikëqyrjes ose përdorimit më të gjerë të të dhënave biometrike.
Ekzistojnë edhe shqetësime praktike. Disa vende kanë tashmë sisteme kombëtare të avancuara të identitetit digjital dhe përshtatja e tyre me një kuadër të ri në nivel europian mund të jetë e kushtueshme dhe komplekse./ad