Koreja e Veriut ka kryer një test të ri ushtarak me një kokë luftarake thërrmuese, e projektuar për t’u montuar në raketa balistike taktike. Sipas agjencisë shtetërore KCNA, Pheniani synon të vendosë lloje të ndryshme të këtyre kokave luftarake deri në fund të vitit.
Testimi u zhvillua të shtunën nga Administrata e Forcave Raketore, me qëllim vlerësimin e aftësive luftarake dhe fuqisë shkatërruese të kokës së re, të emërtuar “Standard Type 2”.
Sipas KCNA-së, testimet kanë treguar se kjo armë mund të shkaktojë shkatërrime në një sipërfaqe prej 12 deri në 13 hektarësh.
Ndërkohë, ushtria e Koresë së Jugut konfirmoi se kishte monitoruar lëshimin e raketës, e cila u qëllua drejt Detit të Verdhë nga një zonë pranë qarkut Chongju, në veriperëndim të Koresë së Veriut.
Shefat e Shtabit të Përbashkët të Koresë së Jugut deklaruan se, në bashkëpunim të ngushtë me Shtetet e Bashkuara, kishin monitoruar paraprakisht aktivitetet ushtarake të Phenianit dhe kishin ruajtur një nivel të lartë gatishmërie.
Bombat thërrmuese janë armë që shpërndajnë dhjetëra ose qindra nënmunicione në një zonë të gjerë, duke mundësuar goditjen e disa objektivave njëkohësisht.
Testimi i fundit vjen në një kohë tensionesh të vazhdueshme në Gadishullin Korean dhe shton shqetësimet ndërkombëtare për zhvillimin e kapaciteteve ushtarake të Koresë së Veriut./ad