Last Updated on 12/11/2026 by Monika
Bashkia Pogradec ka nisur konsultimet publike për Buxhetin e vitit 2026 dhe Paketën Fiskale. Në kuadër të këtij procesi po zhvillohen takime konsultuese me banorët në njësi të ndryshme administrative, me qëllim mbledhjen e kërkesave dhe propozimeve të tyre, në mënyrë që ato të shqyrtohen dhe të prioritizohen në buxhetin e vitit të ardhshëm. Nisur nga rëndësia e këtij procesi dhe transparencës mbi financat vendore, dëshirojmë të bëjmë disa sqarime mbi ecurinë financiare të Bashkisë Pogradec. Sa i përket detyrimeve të prapambetura, të dhënat financiare tregojnë një ulje të ndjeshme të tyre ndër vite.
•Nga 533.697.432 lekë në vitin 2015, detyrimet kanë zbritur në 203.975.818 lekë në vitin 2025, duke shënuar një reduktim prej rreth 329.7 milionë lekësh, ose 61.8%. Një pjesë e konsiderueshme e këtyre detyrimeve i përket viteve 2009-2014 dhe është trashëguar nga administratat e mëparshme.
Shlyerja e tyre është realizuar në mënyrë progresive, përmes të ardhurave të vetë Bashkisë dhe granteve të akorduara nga Ministria, pa cënuar funksionimin e institucionit dhe ofrimin e shërbimeve.
Një tjetër tregues i rëndësishëm është ecuria e të ardhurave të Bashkisë, të cilat kanë shënuar rritje të konsiderueshme.
•Nga 254.849.838 lekë në vitin 2018, ato kanë arritur në 528.468.081 lekë në vitin 2025, pra janë më shumë se dyfishuar, me një rritje prej rreth 107%.
– 2018: 254.849.838 lekë
– 2019: 290.960.649 lekë (+14,2%)
– 2020: 305.411.000 lekë (+5,0%)
– 2021: 353.778.000 lekë (+15,8%)
– 2022: 382.857.000 lekë (+8,2%)
– 2023: 376.436.000 lekë (-1,7%)
– 2024: 473.343.330 lekë (+25,7%)
– 2025: 528.468.081 lekë (+11,6%)
Kjo ecuri, pavarësisht luhatjeve të vogla në vite, pasqyron një tendencë pozitive në administrimin dhe sigurimin e të ardhurave financiare të Bashkisë, duke krijuar më shumë mundësi për përballimin e detyrimeve dhe mbështetjen e shërbimeve e investimeve publike.
Sa i përket të ardhurave të paarkëtuara nga bizneset dhe familjet (edhe këto të akumuluara ndër vite) Bashkia ndjek çdo vit procedurat ligjore për mbledhjen e detyrimeve, duke nisur me njoftimin e debitorëve dhe në rastet e mosshlyerjes, vijohet me masat e parashikuara nga legjislacioni, përfshirë bllokimin e llogarive bankare dhe kufizimin e shërbimeve nga institucionet. Duhet theksuar se detyrimet e regjistruara dhe të ardhurat e paarkëtuara nuk mund të barazohen automatikisht me dëmin ekonomik, pasi bëhet fjalë për kategori të ndryshme financiare.
Vlerësimi i situatës financiare të një institucioni duhet të marrë në konsideratë jo vetëm shifrat e një periudhe të caktuar, por edhe kontekstin historik të detyrimeve, ecurinë e shlyerjes së tyre dhe zhvillimin e të ardhurave ndër vite. Reduktimi me 329.7 milionë lekë i detyrimeve të prapambetura dhe më shumë se dyfishimi i të ardhurave në periudhën e analizuar janë tregues konkretë të ecurisë financiare të institucionit.
Konsultimet për Buxhetin 2026 janë gjithashtu një mundësi që qytetarët të bëhen pjesë aktive e përcaktimit të prioriteteve dhe investimeve për komunitetin e tyre, krahas njësive ato do të vijojnë edhe në qytet me banorët, biznesin etj./mxh