Australia ka ndërmarrë një hap të rëndësishëm drejt rregullimit të industrisë së lojërave të fatit, duke vendosur kufizime të reja mbi mënyrën dhe hapësirat ku lejohen reklamat për to.
Qeveria synon të balancojë lirinë individuale të të rriturve për të luajtur, me nevojën për të mbrojtur fëmijët dhe grupet e ndjeshme nga ndikimi i reklamave agresive. Këto masa vijnë në një kohë kur vendi renditet ndër më të prekurit në botë për humbjet nga bixhozi për frymë.
Reformat parashikojnë kufizime të forta në transmetimet televizive dhe radiofonike, ndalim të reklamave gjatë ngjarjeve sportive të drejtpërdrejta dhe përjashtimin e figurave publike nga promovimi i basteve.
Gjithashtu, reklamat online do të jenë të aksesueshme vetëm për përdorues të regjistruar dhe mbi moshën 18 vjeç, ndërsa promovimi në ambiente sportive dhe në uniforma do të ndalohet plotësisht. Paralelisht, autoritetet do të godasin edhe platformat e paligjshme ndërkombëtare.
Megjithatë, paketa nuk ka përmbushur pritshmëritë e atyre që kërkonin një ndalim total të reklamave të lojërave të fatit. Organizatat e shoqërisë civile dhe ekspertët e shëndetit publik paralajmërojnë se kufizimet e pjesshme nuk janë të mjaftueshme për të mbrojtur plotësisht qytetarët, veçanërisht të rinjtë, nga ndikimi i vazhdueshëm i industrisë së basteve.
Nga ana tjetër, industria e lojërave të fatit dhe sektorë të lidhur si media dhe sporti kanë reaguar ashpër ndaj ndryshimeve, duke i cilësuar ato si të tepruara dhe potencialisht të dëmshme për ekonominë. Përfaqësuesit e tyre paralajmërojnë se kufizimet mund të çojnë në humbje vendesh pune dhe të nxisin rritjen e aktiviteteve të paligjshme jashtë vendit, duke krijuar sfida të reja për autoritetet./kb