Last Updated on 28/09/2026 by Monika
Gjiganti farmaceutik gjerman BioNTech, i bërë i njohur në mbarë botën për zhvillimin e vaksinës kundër COVID-19 së bashku me Pfizer, ka njoftuar planin për mbylljen e tre fabrikave në Gjermani, një vendim që pritet të prekë rreth 1,800 vende pune.
Kompania, me seli në Mainz, ka bërë të ditur se do të mbyllë objektet e saj në Tübingen, Marburg dhe Idar-Oberstein, pasi nuk është gjetur një blerës për këto njësi.
Sipas planit të kompanisë, fabrika në Tübingen do të mbyllet në fund të vitit 2027, ajo në Marburg në fillim të vitit 2028, ndërsa objekti në Idar-Oberstein në fund të vitit 2028.
BioNTech dhe kompania amerikane Pfizer ishin ndër kompanitë e para që morën miratimin për shitjen e një vaksine kundër COVID-19, duke gjeneruar miliarda euro të ardhura gjatë pandemisë.
Megjithatë, kërkesa për vaksinat kundër COVID-19 ka rënë ndjeshëm vitet e fundit, ndërsa BioNTech ende nuk ka sjellë në treg një produkt tjetër që të ketë të njëjtin ndikim komercial.
Në njoftimin e saj, BioNTech shpjegon se mungesa e një blerësi për fabrikat lidhet kryesisht me kushtet e vështira të tregut dhe klimën aktuale të investimeve.
Kompania ka deklaruar se, në mënyrë që procesi i mbylljes së objekteve dhe reduktimit të vendeve të punës të zhvillohet në mënyrë sociale të përgjegjshme, ka arritur marrëveshje me këshillin e punës për kushte shtesë lidhur me shkurtimet e vendeve të punës.
BioNTech po ndryshon fokusin drejt trajtimeve kundër kancerit
BioNTech, e cila punëson rreth 7,200 persona në mbarë botën, prej disa vitesh është përfshirë në një proces transformimi dhe ristrukturimi.
Kompania po përqendron një pjesë të rëndësishme të kërkimit të saj te zhvillimi i trajtimeve të reja, veçanërisht në fushën e onkologjisë.
Në qendër të strategjisë janë imunoterapitë e bazuara në teknologjinë mRNA, si dhe kombinimi i antitrupave me barna të tjera.
Një prej qasjeve që po zhvillon kompania synon përdorimin e antitrupave për të mundësuar shpërndarjen më të targetuar të barnave të kimioterapisë drejt qelizave kancerogjene.
Ky proces kërkon investime të konsiderueshme financiare dhe BioNTech ka regjistruar humbje të mëdha gjatë periudhës së transformimit.
Në gjysmën e parë të këtij viti, kompania raportoi një humbje neto prej 1.35 miliardë eurosh.
Themeluesit largohen nga drejtimi
Ndryshimet në kompani përfshijnë edhe drejtuesit e saj kryesorë dhe bashkëthemeluesit, Ugur Sahin dhe Özlem Türeci.
Të dy pritet të largohen nga kompania deri në fund të vitit dhe t’i përkushtohen zhvillimit të gjeneratës së ardhshme të barnave të bazuara në teknologjinë mRNA përmes një kompanie të re.
BioNTech synon që, përmes ristrukturimit dhe përqendrimit te kërkimi shkencor, të ndërtojë një portofol të ri produktesh, me fokus të veçantë te trajtimet inovative për kancerin./mxh