Qyteti pritës i Lojërave Olimpike Dimërore, Cortina d’Ampezzo, u zgjua i mbuluar nga dëbora këtë të premte, vetëm tre ditë para përfundimit të garave.
Reshjet e dendura të së enjtes krijuan probleme në qarkullimin rrugor, ndërsa ekipet bashkiake dolën që në orët e para të mëngjesit për të pastruar rrugët dhe trotuaret, me qëllim garantimin e lëvizjes normale për sportistët dhe vizitorët.
Megjithatë, dëbora nuk ndikoi në zhvillimin e aktiviteteve sportive të mbetura. Garat e skive alpine tashmë kanë përfunduar, ndërsa seancat stërvitore dhe garat në disiplinat e bobit dhe curlingut vijuan sipas programit.
Sipas meteorologëve, fundjava pritet të sjellë përmirësim të kushteve atmosferike, me kthjellime dhe intervale me diell.
Lojërat Olimpike do të mbyllen zyrtarisht të dielën në mbrëmje, kur do të shuhet flaka olimpike në sheshin qendror të qytetit, duke i dhënë fund një tjetër edicioni të festës më të madhe të sporteve dimërore./MXH