Last Updated on 15/10/2025 by EL
Financierët më të rëndësishëm në SHBA kanë paralajmëruar për një përkeqësim të standardeve të huadhënies, pas tronditjes së tregjeve të kreditit nga kolapsi i kompanive “First Brands Group” dhe “Tricolor Holdings“.
Drejtori ekzekutiv i “Apollo Global Management“, Marc Rowan, tha se shpërbërja e dy kompanive pasoi vite ku huadhënësit kishin kërkuar huamarrës më të rrezikshëm.
“Nuk më habit që po shohim aksidente në fazën e vonë të ciklit,” tha Rowan të martën. “Mendoj se dëshira për të fituar në një treg konkurrues ndonjëherë çon në rrugë të shkurta.”
Dështimi i muajit të kaluar i kompanisë së pjesëve të këmbimit të automjeve “First Brands” dhe huadhënësit të makinave me kredi të dobët “Tricolor” ka pasur jehonë në tregjet e kreditit, duke shkaktuar humbje të mëdha për investitorë si “Blackstone” dhe “PGIM”, si dhe për banka të mëdha si “Jefferies”.
Ky zhvillim ka tërhequr gjithashtu një vëmendje më të madhe ndaj industrisë së kapitalit privat dhe mungesës së transparencës rreth huamarrësve, të cilët shpesh janë të mbingarkuar me borxhe.
“Në disa nga këto kredi më të mbingarkuara, ka pasur një gatishmëri për të anashkaluar rregullat,” tha Rowan në Samitin e Kapitalit Privat të Financial Times në Londër.
Rowan dhe presidenti i “Blackstone”, Jonathan Gray, fajësuan bankat për ekspozimin e madh ndaj kompanive “First Brands” dhe “Tricolor”, por theksuan se këto kolapse nuk janë shenja të një problemi sistemik.
“Ajo që është interesante është se të dyja proceset janë udhëhequr nga bankat,” tha Gray në të njëjtën konferencë, duke refuzuar “100 për qind” idenë se kjo ishte një paralajmërim për një krizë më të madhe.
“Apollo”, larg nga mbështetja për “First Brands”, kishte ndërtuar një pozicion të shkurtër kundër borxhit të lidhur me grupin para kolapsit, që do të thotë se do të përfitonte nëse kompania nuk do të shlyente huatë.
“Shumica e mbajtësve të rrezikut të shpallur janë, në fakt, institucione financiare,” tha Rowan.
Bankat dhe firmat e kapitalit privat kanë qenë në kundërshtim vitet e fundit, pasi bizneset kanë kaluar gjithnjë e më shumë drejt kreditit privat për nevojat e tyre të huamarrjes. Huadhënësit tradicionalë e kanë quajtur këtë kalim si “arbitrazh rregullator” dhe janë ankuar se institucionet financiare jo-bankare janë shumë pak të rregulluara.
Por rastet e “First Brands” dhe “Tricolor” kanë zbuluar se të dyja palët janë të ndërlidhura përmes strukturave financiare komplekse që mund të fshehin se kush mban rrezikun e nënshkrimit, veçanërisht kur bankat përpiqen të ruajnë pjesën e tyre të tregut.
Drejtori ekzekutiv i “JPMorgan Chase”, Jamie Dimon, shprehu shqetësime të ngjashme të martën, ndërsa raportoi fitime të forta që u dëmtuan nga një humbje prej 170 milionë dollarësh për shkak të kolapsit të “Tricolor”.
“Kur ndodh diçka e tillë, më ngrihet antena. Ndoshta nuk duhet ta them këtë, por kur sheh një buburrec, ka gjasa të ketë më shumë,” tha ai. “Sipas mendimit tim, ka pasur mashtrime në disa prej këtyre rasteve, por kjo nuk do të thotë që nuk mund të përmirësojmë procedurat tona,” shtoi ai, duke pranuar se ekspozimi ndaj Tricolor “nuk ishte momenti ynë më i mirë”.
Ndërkohë, Fondi Monetar Ndërkombëtar (FMN) të martën kërkoi që rregullatorët të përqendrohen në ekspozimin e bankave ndaj sektorit, duke vënë në dukje se “bankat po huazojnë gjithnjë e më shumë fondeve të kreditit privat sepse këto hua shpesh sjellin kthime më të larta mbi kapitalin sesa huadhënia tradicionale tregtare dhe industriale”.