Reperi amerikan Jay-Z do të performojë në spektaklin muzikor të pjesës së parë të Super Bowl në shkurt, njoftoi Liga Kombëtare e Futbollit Amerikan (NFL). Kjo do të jetë hera e parë që artisti ngjitet në skenën e finales së kampionatit, pavarësisht rolit të tij të rëndësishëm në organizimin e këtij eventi.
Kompania e Jay-Z, Roc Nation, është përgjegjëse për prodhimin e spektaklit të pjesës së parë që prej vitit 2019. Reperi luan gjithashtu një rol kyç në përzgjedhjen e artistëve që performojnë çdo vit, por deri më tani nuk kishte qenë vetë pjesë e këtij spektakli.
“Pritshmëritë se cilët artistë mund të ftojë Jay-Z për të performuar së bashku me të gjatë pushimit të ndeshjes së madhe do të nisin që tani”, deklaroi NFL në një njoftim. “Sigurisht, bashkëshortja e tij, Beyoncé, do të jetë në krye të listës së emrave të përfolur”.
Edicioni i ardhshëm, Super Bowl LXI, do të zhvillohet më 14 shkurt, pranë Los Angeles-it.
Ylli i hip-hopit do t’u bashkohet emrave të njohur që kanë performuar në këtë skenë vitet e fundit, mes tyre Bad Bunny, Kendrick Lamar, Usher, Rihanna dhe The Weeknd.
Spektakli muzikor i Super Bowl tërheq vëmendjen e publikut në mbarë botën, ndërsa ndeshja ndiqet nga dhjetëra miliona njerëz në Shtetet e Bashkuara.
Performanca e Kendrick Lamar në vitin 2025 u bë spektakli i pjesës së parë më i ndjekur në historinë e Super Bowl dhe u vlerësua me çmimin Emmy për regjinë më të mirë muzikore.
Jay-Z: Një rrugëtim 30-vjeçar drejt skenës së Super Bowl
Njoftimi për performancën e Jay-Z erdhi pasi reperi, emri i vërtetë i të cilit është Shawn Carter, mbajti dy koncerte fundjavën e kaluar në stadiumin e Los Angeles-it, ku do të zhvillohet edhe Super Bowl.
Koncertet ishin pjesë e një turi të organizuar për të festuar 30-vjetorin e albumit të tij debutues, Reasonable Doubt.
“Që nga Reasonable Doubt e deri te ngjitja në skenën e Super Bowl, ky ka qenë një rrugëtim”, u shpreh Jay-Z.
“30 vite muzikë, punë dhe kulturë në skenën më të madhe në botë. Ky rrugëtim vazhdon të jetë një ëndërr e bërë realitet”, shtoi reperi.
Kreu i NFL-së: Mezi presim që fansat ta përjetojnë këtë spektakël
Komisioneri i NFL-së, Roger Goodell, shprehu entuziazmin për performancën e artistit, duke vlerësuar talentin, kreativitetin dhe ndikimin e tij kulturor.
“Jam jashtëzakonisht i emocionuar që fansat në mbarë botën do të përjetojnë artin, kreativitetin dhe ndikimin kulturor që ai do të sjellë”, deklaroi Goodell.
Ai tregoi gjithashtu se, kur NFL arriti fillimisht marrëveshjen me Roc Nation për prodhimin e spektaklit, kishte vetëm një kërkesë: që një ditë Jay-Z të ngjitej vetë në skenë, në momentin që do ta konsideronte të përshtatshëm.
“Kur arritëm për herë të parë marrëveshjen me Roc Nation për prodhimin e spektaklit, kisha vetëm një kërkesë: që Jay-Z të ngjitej vetë në skenë një ditë, kur të ndiente se kishte ardhur momenti i duhur”, tha Goodell.
Jay-Z është një nga figurat më të rëndësishme të hip-hopit dhe industrisë muzikore botërore. Ai është reperi i parë që është përfshirë në Songwriters Hall of Fame, ka fituar 25 çmime Grammy dhe është anëtar i Rock & Roll Hall of Fame që prej vitit 2021./mxh