Last Updated on 18/09/2026 by EL
Presidenti francez Emmanuel Macron ka njoftuar se do të thërrasë një takim të vendeve të G7 për krizën energjetike, ndërsa ka paralajmëruar se natyra e kërcënimeve ruse ndaj Europës po ndryshon.
Macron foli pas një takimi në Pallatin Élysée me kandidatët kryesorë për zgjedhjet presidenciale të vitit 2027 ose përfaqësuesit e tyre. Sipas tij, Europa duhet të përgatitet për një rritje të sulmeve hibride dhe të forcojë mbrojtjen e infrastrukturës kritike.
“Ka një ndryshim në natyrën e agresionit dhe kërcënimeve ruse në Europë”, deklaroi Macron, duke bërë të ditur se ka kërkuar hartimin e një plani për mbrojtjen e infrastrukturës kritike nga sulmet hibride ruse.
Si një nga shembujt, presidenti francez përmendi zbulimin e një droni të pajisur me eksplozivë në aeroportin e Leipzigut gjatë kësaj vere. Macron theksoi se Franca dhe Europa nuk duhet të frikësohen nga këto kërcënime, pasi sipas tij siguria e Ukrainës lidhet drejtpërdrejt me sigurinë europiane.
“Ne nuk frikësohemi, sepse e dimë se ajo që është në lojë në Ukrainë është siguria jonë sot dhe nesër”, tha Macron.
Presidenti francez nënvizoi gjithashtu nevojën për të vazhduar dërgimin e mesazheve drejt Rusisë, por paralajmëroi se duhet shmangur një situatë që do ta çonte Francën në një gjendje të drejtpërdrejtë konfrontimi me Moskën.
Çmimet e karburanteve, një tjetër shqetësim
Gjatë takimit u diskutua edhe rritja e fortë e çmimeve të karburanteve, e cila po ushtron presion mbi familjet dhe ekonominë.
Macron tha se opinioni publik rrezikon të harrojë se një nga shkaqet kryesore të krizës është situata ndërkombëtare. Sipas tij, rritja e çmimeve nuk është rezultat i vendimeve të qeverisë franceze.
Bllokimet në Ngushticën e Hormuzit, në Gjirin Persik, dhe më pas në Ngushticën Bab el-Mandeb, në Detin e Kuq, kanë pasoja të drejtpërdrejta mbi furnizimin energjetik dhe jetën e përditshme, argumentoi presidenti francez.
Macron paralajmëroi se përpara se të shpenzohen shuma të mëdha parash për të kompensuar rritjen e çmimeve, duhet të trajtohen shkaqet e krizës. Në të kundërt, kostoja mund të përkthehet në një deficit më të lartë publik ose në rritje taksash.
Për këtë arsye, Macron ka njoftuar se synon të mbledhë G7 në një takim të posaçëm për energjinë gjatë javëve të ardhshme. Në fokus pritet të jetë koordinimi mes vendeve për nivelet e rezervave energjetike dhe masat për të përballuar pasojat e luhatjeve të forta të tregjeve./ET