Edhe pse kanë kaluar dekada nga vdekja tragjike e Princeshë Dianës, kujtimi i saj vijon të jetë pjesë e pandashme e historisë së familjes mbretërore britanike. Tani, vëllai i saj, Earl Spencer, ka vendosur të rikthehet te ngjarjet e asaj kohe përmes librit të tij të ri, “Swan Song”.
Në qendër të rrëfimit të tij është edhe funerali i Dianës, i mbajtur më 6 shtator 1997 në Westminster Abbey. Spencer kujton fjalimin që mbajti përpara mijëra njerëzve dhe shpjegon se një prej frazave të përdorura prej tij ishte zgjedhur me vetëdije.
Ai tha se kishte premtuar se kujtimi i motrës së tij nuk do të “shuhej kurrë”, pasi, sipas rrëfimit të tij, Charles i kishte thënë në atë periudhë se interesi publik për Dianën do të zhdukej shpejt.
Për Spencer, shkrimi i librit është më shumë se një rikthim te e kaluara. Në një intervistë për BBC, ai u shpreh se ndihet i detyruar të dokumentojë përvojat e tij, jo vetëm si vëllai i Dianës, por edhe si një person që ka qenë pranë disa prej ngjarjeve më të rëndësishme të jetës së saj.
“Të dy prindërit e mi vdiqën në të 60-at dhe unë jam në të 60-at”, tregoi ai, duke shpjeguar se kjo fazë e jetës e ka shtyrë të reflektojë më shumë mbi kujtesën, humbjen dhe kalimin e kohës.
Spencer foli gjithashtu hapur për dhimbjen që vazhdon të ndiejë për humbjen e motrës. I emocionuar gjatë intervistës, ai tha se Diana i mungon çdo ditë dhe se humbja e një motre apo vëllai është një dhimbje që nuk zhduket plotësisht me kalimin e viteve.
Përmes “Swan Song”, Spencer synon të lërë pas një dëshmi personale mbi Dianën dhe ngjarjet që ai përjetoi nga afër, duke rikthyer në vëmendje një histori që, pavarësisht viteve të kaluara, vazhdon të ngjallë interes të madh./mxh