Last Updated on 25/12/2025 by Monika
Mbreti i Britanisë së Madhe, Charles III, ka theksuar rëndësinë e unitetit në diversitet në mesazhin e tij tradicional të Krishtlindjes, në një kohë kur luftërat dhe tensionet globale po vënë në provë shoqëritë në mbarë botën.
Në fjalimin e tij vjetor, mbajtur nga Westminster Abbey, Mbreti 77-vjeçar u shpreh se diversiteti i komuniteteve është një forcë që ndihmon që e drejta të triumfojë mbi të gabuarën. Ai nënvizoi se takimet me njerëz të besimeve të ndryshme i kanë treguar se, pavarësisht dallimeve, ekziston një dëshirë e përbashkët për paqe dhe respekt për jetën.
Mbreti Charles foli edhe për temën e “udhëtimit” dhe për rëndësinë e tregimit të dhembshurisë ndaj njerëzve në lëvizje, një mesazh që lidhet drejtpërdrejt me debatet aktuale mbi migracionin.
Mesazhi u pasua nga një performancë e një kori ukrainas, i veshur me kostume tradicionale, së bashku me Korin Mbretëror të Operës së Londrës. Mbreti ka shprehur vazhdimisht mbështetjen e tij për Ukrainën dhe ka pritur disa herë Presidentin Volodymyr Zelenskiy gjatë këtij viti.
Edhe pse kushtetuta kërkon që monarku të qëndrojë mbi politikën, Charles ka folur shpesh për krizat globale, duke shprehur shqetësim për konfliktin Izrael–Gaza dhe duke dënuar aktet e dhunës kundër komuniteteve hebreje.
Në fjalimin e tij, Mbreti vlerësoi gjithashtu veteranët dhe punonjësit humanitarë për guximin e tyre, duke thënë se ata i japin shpresë në kohë të vështira.
Viti që po mbyllet ka qenë sfidues edhe për familjen mbretërore. Charles njoftoi se trajtimi i tij ndaj kancerit mund të reduktohet vitin e ardhshëm, ndërsa Princesha e Uellsit, Kate, bëri të ditur se është në remision.
Nga ana tjetër, Mbreti i hoqi titujt vëllait të tij, Princit Andrew, ndërsa një moment i rrallë pajtimi erdhi në shtator, kur u takua me djalin e tij, Princin Harry, pas gati dy vitesh ndarje.
Mesazhi i Krishtlindjes i Mbretit Charles mbetet një thirrje për shpresë, dialog dhe bashkim në një botë gjithnjë e më të përçarë./mxh