Kryeministrja italiane Giorgia Meloni deklaroi se nuk ka mbajtur kurrë qëndrime antiamerikane dhe se gjithmonë ka besuar në rëndësinë e unitetit të Perëndimit.
Në një intervistë për grupin televiziv Mediaset, Meloni theksoi se marrëdhëniet e forta ndërtohen mbi ndershmërinë dhe se qëndrimet e saj kanë mbetur të pandryshuara ndër vite.
“Nuk kam mbajtur një qëndrim antiamerikan sot, nuk kam qenë e nënshtruar dje. Jam një person që beson se Perëndimi është më i fortë kur është i bashkuar”, u shpreh ajo.
Kryeministrja italiane komentoi edhe deklaratat e Sekretarit të Përgjithshëm të NATO-s, Mark Rutte, lidhur me ngritjen e qindra avionëve nga baza e NATO-s në Sigonella të Siçilisë gjatë Operacionit “Epic Fury”.
Sipas Melonit, numri i fluturimeve të përmendura nga Rutte ishte më i ulët se në vitet e mëparshme dhe bëhej fjalë për aktivitete të parashikuara në marrëveshjet ekzistuese, të cilat nuk kishin karakter agresiv.
“Ato ishin fluturime që janë pjesë e aktiviteteve për të cilat është dhënë leja përkatëse. Nuk bëhet fjalë për operacione me natyrë agresive. U dha një informacion që mund të interpretohej gabim, siç ndodhi edhe nga autoritetet iraniane. Duhet të jemi më të kujdesshëm”, tha ajo.
Duke folur për politikën e brendshme italiane, Meloni u ndal edhe te zgjedhja e Presidentit të ardhshëm të Republikës, që pritet të zhvillohet në vitin 2029. Ajo la të kuptohet se për herë të parë mund të thyhet tradita e zgjedhjes së një presidenti të mbështetur nga qendra e majtë.
“Nuk është e pamundur që edhe kjo tabu e madhe të kapërcehet, pra të zgjidhet një President i Republikës që nuk do të jetë i qendrës së majtë”, deklaroi kryeministrja italiane./ad