Grupi legjendar britanik “Rolling Stones” ka barazuar rekordin e “Beatles” për numrin më të madh të albumeve që kanë arritur vendin e parë në klasifikimin zyrtar britanik. Albumi i tyre i ri, “Foreign Tongues”, është bërë albumi i 15-të i grupit që ngjitet në krye të listës së albumeve në Britaninë e Madhe.
Albumi me 14 këngë vjen pas suksesit të “Hackney Diamonds” të vitit 2023 dhe është vlerësuar gjerësisht nga kritika si një nga projektet më të mira të grupit në vitet e fundit.
Me këtë sukses, Mick Jagger, Keith Richards dhe Ronnie Wood barazojnë një rekord historik të vendosur nga “The Beatles”. Albumi i 25-të në studio i grupit u publikua më 10 korrik dhe përmban kontribute nga Paul McCartney, Robert Smith i The Cure dhe bateristi i Red Hot Chili Peppers, Chad Smith.
Gjithashtu përmban një paraqitje të veçantë nga bateristi i ndjerë i The Rolling Stones, Charlie Watts, nga një nga seancat e tij të fundit të regjistrimit para vdekjes së tij në vitin 2021.
Rokerët veteranë arritën për herë të fundit në vendin e parë në Listën Zyrtare të Albumeve në Mbretërinë e Bashkuar me albumin e tyre të vitit 2023, “Hackney Diamonds”, i cili fitoi çmimin Grammy për albumin më të mirë rok.
“Unë dhe Roni jemi shumë të dhënë pas kësaj, kështu që shpresojmë t’i shohim të gjithë në turne”, tha Jagger, 82 vjeç, për Reuters./mxh