Last Updated on 15/11/2025 by Monika
Qielli i natës u ndriçua nga aurorat e veriut, pas disa shpërthimeve diellore që shkaktuan një stuhi të rrallë gjeomagnetike. Fenomeni, i njohur si shpërthime masive korone (CME), solli ngjyra të gjalla të gjelbërta, të kuqe, të purpurta dhe rozë që mbuluan pjesë të mëdha të hemisferës veriore, duke u dukur deri në zonat jugore të SHBA.
Stuhia gjeomagnetike e klasës G4 arriti nivelin 4 nga 5 në shkallën e NOAA, vetëm një hap larg nivelit “ekstrem” (G5). Ngjarja konsiderohet një nga stuhitë më të fuqishme që nga maji i vitit 2024.
Ngjarja ndikoi gjithashtu në operacionet hapësinore, duke detyruar shtyrjen e nisjes së raketës New Glenn të Blue Origin, e cila do të transportonte dy satelitë të NASA-s drejt Marsit, për shkak të rrezikut nga ndikimet e stuhisë në atmosferë dhe objektet kozmike.
Sipas NOAA, fenomeni nisi me një shpërthim diellor X5.1 që ndërpreu përkohësisht komunikimet me radio me frekuencë të lartë, i ndjekur nga disa CME, dy prej të cilave goditën Tokën dhe shkaktuan stuhinë gjeomagnetike G4 dhe shfaqjen masive të aurorave./MXH