Veshjet e Bob Mackie-t ishin unike në llojin e tyre.
Gjatë karrierës së tij disa dekadash, kostumografi legjendar bashkëpunoi me dhjetëra yje si Cher, Carol Burnett, Tina Turner, Diana Ross, Barbra Streisand, Liza Minnelli dhe Bette Midler, duke krijuar veshje të paharrueshme për televizionin, skenën dhe tapetin e kuq përpara se të ndahej nga jeta.
“Është paksa çmenduri. Pasi emisioni i Cher doli nga transmetimi, gjërat u qetësuan për njëfarë kohe. Por 10 apo 15 vjet më vonë, papritur të gjithë po kërkonin në internet dhe po kopjonin gjërat që kisha bërë më parë. Kështu që është gjithmonë diçka e çuditshme kur ndodh kjo; mendon: ‘Oh, të gjithë e kanë harruar atë’, por me sa duket nuk e kishin harruar, ose thjesht njerëz të rinj e zbuluan atë, çfarëdo që të ketë qenë ajo që bëra”, tha Mackie për Tatler në vitin 2022.
Fustani i Marilyn Monroe “Happy Birthday, Mr. President”
Meqenëse punonte për dizajnerin Jean Louis në fillimet e karrierës së tij, Mackie-t iu ngarkua detyra të bënte një fustan për Marilyn Monroe. Ai tha për PEOPLE në nëntor 2025 se nuk e kishte idenë në atë kohë që kishte skicuar fustanin ngjyrë trupi që ajo do të vishte përfundimisht për t’i kënduar “Happy Birthday” Presidentit John F. Kennedy gjatë një aktiviteti për mbledhje fondesh në vitin 1962.
“Ishte një punë shumë e hershme. (Dizajneri Jean Louis) nuk donte të më thoshte se përse shërbente. Thjesht më tha: ‘Është për Marilyn.’ Dhe unë i thashë: ‘Oh, mirë’, por ai nuk donte të më tregonte se cila ishte me të vërtetë çështja”, tha Mackie për PEOPLE.
“Fustani i zhveshur” i Cher në Met Gala 1974
Cher nxiti mjaft reagime kur u shfaq në Met Gala në vitin 1974 me një fustan që krijonte iluzionin sikur ishte e zhveshur, që Mackie e kishte krijuar. Dizajneri fitues i çmimit Emmy zbuloi për PEOPLE në janar 2025 se këngëtarja e hitit “Believe” e kishte zgjedhur vetë atë pamje me transparencë dhe pupla.
Fustani me perde i Carol Burnett nga “Went With the Wind!” (1976)
Mackie krijoi mbi 17 mijë dizajne për The Carol Burnett Show gjatë periudhës së transmetimit në vitet ’60 dhe ’70, por asnjë kostum nuk ishte aq i paharrueshëm sa fustani prej perdeje. Burnett e veshi këtë veshje, e cila përfshinte një shufër bronzi perdeje dhe një kapelë të bërë nga një rrip zbukurues perdeje, për të luajtur rolin e Scarlett O’Hara në skeçin Went With the Wind!, i cili parodizoi filmin Gone With the Wind.
Kostumi trupor me krahë i Tina Turner (1977)
Në vitin 1977, Mackie bëri një kostum trupor në ngjyrë ari dhe argjendi për Turner, i cili kishte krahë të mëdhenj me pala. Ai tha për PEOPLE në nëntor 2025 se ai lëvizte “në mënyrë të çmendur” kur ajo performonte gjatë rezidencës së saj në Caesar’s Palace. Këngëtarja e ndjerë e veshi gjithashtu këtë veshje për sesionin e saj fotografik me Harry Langdon në vitin 1977 dhe në një koncert televiziv vitin e ardhshëm.
Kostumi si flakë i Tina Turner (1978)
Pamja tjetër mbresëlënëse e Mackie-t për Tina-n ishte kostumi trupor si zjarri që ai dizajnoi për shfaqjen e saj në klubet e natës në vitin 1978. Veshja me xixa shoqërohej me një zbukurim koke me pupla portokalli, i cili hyri në historinë e modës.
Uniforma me shkëlqim e Elton John për Dodgers (1975)
Kur Sir Elton John performoi në Dodger Stadium në vitin 1975, ai e bëri këtë duke mbajtur një uniformë të Los Angeles Dodgers të mbushur me gurë e xixa, e realizuar nga Mackie. Ata bashkëpunuan përsëri për turneun e lamtumirës së këngëtarit në nëntor 2022 për të rikrijuar atë pamje, përfshirë kapelën e mbuluar me kristale dhe perla që ishte humbur vite më parë.
Fustani kontrovers i Cher në Oscars 1986
Mackie dhe Cher bashkëpunuan shumë herë ndër vite për dizajne që tërhiqnin vëmendjen, përfshirë fustanin e saj kontrovers që linte barkun jashtë në ceremoninë e Oscars në vitin 1986. Në një intervistë të nëntorit 2019 me Vogue, ikona e popit pranoi se e veshi sutjenin e zbukuruar me gurë dhe mbulesën e kokës me pupla për të prezantuar një çmim sepse Akademia “nuk e donte me të vërtetë” atë.
Dizajneri tha për PEOPLE në prill 2019 se e kishte këshilluar Cher të mos e vishte atë.
“Kritikët thanë: E po, kjo nuk është modë.
E po, nuk ishte menduar të ishte modë. Ajo donte ta bënte thjesht sepse ishte diçka argëtuese”, kujtoi Mackie.
Fustani plot shkëlqim i Madonna-s në Oscars 1991
Dizajneri tha për Rolling Stone në maj 2019 se Madonna donte të vishte një pamje të frymëzuar nga Marilyn Monroe në ceremoninë e Academy Awards në vitin 1991. Kështu që ai i bëri asaj një fustan të bardhë me rruaza argjendi që shkëlqente, i cili u fotografua e u publikua “kudo” falë faktit se ajo erdhi me Michael Jackson si shoqërues. Tre dekada më vonë, Sabrina Carpenter e veshi atë fustan në MTV Video Music Awards 2024.
Kostumi trupor me xixa i Pink në Grammy Awards 2010
Gjatë performancës së saj mahnitëse të “Glitter in the Air” në Grammy Awards 2010, Pink shkëlqeu me një kostum trupor transparent, me rripa dhe i mbuluar me gurë, për të cilin Mackie tha se duhej të ishte “perfekt”.
“Nuk mund të ketë asnjë gabim sepse vetëm një defekt i vogël në veshje mund të jetë katastrofik kur je lart në ajër kështu”, shpjegoi ai më vonë për Rolling Stone.
Fustani i Miley Cyrus në Grammy Awards 2024
Fustani vintage nga Mackie që Miley Cyrus veshi gjatë performancës së saj të “Flowers” në Grammy Awards 2024 ishte pothuajse po aq ikonik sa ndryshimi i tekstit të këngës nga ana e saj për të thirrur: “Sapo fitova çmimin tim të parë Grammy!”
Por veshja, e dizajnuar fillimisht për një koleksion të vitit 2002 me tematikë nga Broadway, duhet të ketë pasur shumë rëndësi për këngëtaren, pasi ajo e bleu atë në një ankand disa muaj më vonë./mxh