Administrata Federale e Aviacionit në SHBA (FAA) urdhëroi të premten ndalimin e të gjitha fluturimeve në mbarë vendin, për shkak të një problemi në komunikim që preku kontrollin e trafikut ajror. Në njoftimin e agjencisë thuhej se ndalimi erdhi “për shkak të rrethanave të jashtëzakonshme dhe për arsye sigurie”.
Tashmë, sipas “Retuers“, raportohet se i gjithë defekti mund të jetë shkaktuar nga një ruter i vetëm, i instaluar nga kontraktori qeveritar “L3Harris”.
Incidenti është shembulli më i fundit i sistemit të vjetëruar të telekomunikacionit të kontrollit të trafikut ajror në SHBA dhe i vështirësive për të zëvendësuar sistemet.
Sistemet e telekomunikacionit të vjetëruara të FAA-së vitet e fundit kanë dështuar pas ndërprerjeve të gabuara të fibrave optike, fshirjes aksidentale të skedarëve dhe një arome të fortë kimike të shkaktuar nga një komponent i shkrirë. Zyrtarët thanë se sistemi do të dështojë përsëri derisa të përmirësohet siç duhet.
“Ky ishte një sistem i FAA-s që nuk i plotësoi kërkesat e momentit”, tha të shtunën Sekretari i Transportit Sean Duffy.
Duffy tha të premten se L3Harris po kryente mirëmbajtje rutinë për të ndërruar linjat e telekomunikacionit nga telat e vjetër të bakrit në fibra në të paktën një vendndodhje të largët. Zyrtarët i thanë Reuters se mund të ketë pasur probleme me routerët e instaluar si në Arkansas ashtu edhe në Teksas.
“Po punojmë për të përcaktuar nëse kemi pasur paaftësi, që do të thotë se ishte gabim i përdoruesit apo gabim i instaluesit nga L3Harris , apo nëse ata instaluan një router me defekt. Nuk e kemi përcaktuar ende se cili ishte defekti”, tha Duffy.
L3Harris tha se e mori çështjen seriozisht dhe se po “mbështeste FAA-në në hetimin e saj për të kuptuar kushtet që çuan në ndalimin tokësor të udhëtimit ajror më 13 nëntor”. L3 vuri në dukje se ka përfunduar më shumë se 70% të konvertimit të planifikuar të komunikimeve të hapësirës ajrore nga telat e trashëguar të bakrit në një sistem me fibra optike.
FAA shpenzon 1 miliard dollarë çdo vit për të mirëmbajtur sistemin e saj të vjetër të telave të bakrit dhe po garon për ta zëvendësuar atë me komunikime më moderne të bazuara në fibra. /ad