Të paktën 11 persona kanë humbur jetën dhe dhjetëra të tjerë janë plagosur pas përleshjeve të dhunshme mes forcave të sigurisë dhe mbështetësve të një organizate të shpallur të jashtëligjshme në Kashmirin e administruar nga Pakistani.
Ngjarja ndodhi të dielën, vetëm një ditë para një proteste të madhe të planifikuar nga organizata Joint Aëami Action Committee (JAAC).
Sipas autoriteteve lokale, tensionet u përshkallëzuan pas një vendimi të Gjykatës Supreme Azad Jammu dhe Kashmirit, e cila vendosi se 12 vendet parlamentare të rezervuara për refugjatët kashmiras që jetojnë në Pakistan janë të mbrojtura nga kushtetuta dhe nuk mund të hiqen, pa ndryshime kushtetuese.
Ky vendim shkaktoi reagime të forta nga JAAC, e cila prej vitesh kërkon më shumë të drejta politike për banorët e rajonit dhe kundërshton ekzistencën e këtyre vendeve të rezervuara, duke argumentuar se refugjatët kanë ndikim disproporcional në proceset politike.
Komisioneri i sektorit të Poonch, Sardar Uaheed Khan, deklaroi se katër policë dhe një kalimtar i rastësishëm humbën jetën, pasi protestues të armatosur qëlluan ndaj forcave të sigurisë. Ai shtoi se gjatë kundërpërgjigjes së autoriteteve u vranë gjashtë protestues.
Nga ana tjetër, drejtuesit e JAAC akuzuan shtetin për përdorim të tepruar të forcës. Një prej liderëve të lëvizjes, Shaukat Nauaz Mir, e cilësoi operacionin e sigurisë si një “masakër ndaj popullit” dhe bëri thirrje për pjesëmarrje masive në protestën e planifikuar për 9 qershor.
Shefi i policisë, Liaqat Malik, njoftoi se 23 anëtarë të forcave të sigurisë dhe rreth 50 protestues u plagosën gjatë incidenteve. Gjithashtu, rreth 30 persona janë arrestuar.
Sipas policisë, mbështetës të armatosur të JAAC hapën zjarr ndaj forcave të rendit në qytetin Raualakot dhe më pas rrethuan një spital ushtarak, duke ndërprerë shërbimet mjekësore. Autoritetet thanë se protestuesit i vunë zjarrin disa objekteve dhe shkaktuan dëme në prona publike dhe private.
Qeveria rajonale e kishte shpallur JAAC organizatë të ndaluar vetëm dy ditë më parë, duke e futur atë në listën e grupeve të ndaluara sipas ligjit kundër terrorizmit. Autoritetet gjithashtu u kërkuan turistëve vendas dhe të huaj të largoheshin nga rajoni përpara protestës së paralajmëruar.
Kashmiri i administruar nga Pakistani ka përjetuar protesta të shumta gjatë dy viteve të fundit, kryesisht për shkak të rritjes së çmimeve të energjisë elektrike dhe produkteve bazë ushqimore. Disa prej këtyre demonstratave kanë përfunduar me viktima pas përplasjeve mes protestuesve dhe forcave të sigurisë, duke reflektuar tensionet e vazhdueshme politike dhe sociale në këtë rajon të ndjeshëm të Himalajeve./mxh