Boshllëkun e krijuar nga mungesa e punonjësve vendas, bizneset po mundohen ta mbushin me të huaj, por shifrat tregojnë se Shqipëria ende nuk është tërheqëse për ta.
Shifrat zyrtare tregojnë se numri i shtetasve të huaj që kanë leje punësimi në vend arriti 9,825 persona nga 8.305 të huaj që ishte në fund të vitit 2022.
Tirana, Durrësi dhe Vlora janë qytetet me përqendrimin më të madh të punonjësve të huaj. Referuar raportit të Ministrisë së Brendshme mbi Profilin e Migracionit, thuhet se afro 42% e të huajve ose 4207 persona me kontratë pune në Shqipëri, janë në biznese në Tiranë.
Më pas renditet qarku Durrës me mbi 2 mijë të huaj të punësuar dhe Vlora me 1208 punonjës të huaj. Më pak mundësi për të huajt duket se jep qarku i Dibrës, e cila ka vetëm 51 të punësuar shtetas të huaj.
Sektori i Akomodimit dhe shërbimit ushqimor, ku bëjnë pjesë bare, restorante, hotele kanë numrin më të madh të punonjësve të huaj me afro 1100, ndjekur nga sektori i ndërtimit 999 punonjës të huaj, aktivitete të tjera shërbimi me 985 dhe në fushën e tregtisë 848 të huaj. Pjesa tjetër janë në sektorë të tjerë të ekonomisë, si në industrinë përpunuese ashtu edhe në atë prodhuese.
Interesi më i madh për të fituar leje pune në vend është nga Turqia, Bangladeshi, India dhe Nepali. Gjatë vitit të shkuar qeveria nisi negociatat me autoritetet filipinase për të marrë me mijëra punonjës të kualifikuar, me objektiv kryesor punësimin e tyre në sektorin e turizmit./ S,M
