Policia e Tiranës po e heton si vrasje ngjarjen e ndodhur në rrugën “Gjon Muzaka”, ku mesditën e sotme u gjet e pajetë një shtetase e huaj në një banesë të marrë me qira.
Mësohet se autoritetet shqiptare kanë shpallur në kërkim bashkëshortin e vajzës, pasi dyshojnë se ai mund të jetë autor i vrasjes së 30-vjeçares, në trupin e së cilin janë konstatuar plagë të ndryshme, që dyshohet se janë shkaktuar me mjet prerës.
Sipas burimeve e reja jetonte në shtëpinë e marrë me qira përmes platformës Airbnb, me bashkëshortin e saj, i cili është po ashtu shtetas i huaj.
Mësohet se çifti kishin 7 ditë që kishin ardhur në Shqipëri, por nuk dihet arsyeja përse ndodheshin në vendin tonë. Policia është njoftuar për ngjarjen nga pronarja e shtëpisë që i kishte dhënë çiftit banesën me qira.
Dyshohet se ngjarja mund të ketë ndodhur disa ditë më parë, por forcat e rendit vetëm sot janë njoftuar nga pronarja banesës. Ndërkohë, mësohet se bashkëshorti i vajzës nuk është gjetur nga policia dhe ai dyshohet se është larguar nga Shqipëria.
Policia nuk ka siguruar ende të dhëna se nga çifti ishte me origjinë, por pronarja e banesës ka pohuar se flisnin në gjuhën arabe.
Sakaq, grupi hetimor po punon për identifikimin e kësaj shtetaseje, sqarimin e rrethanave dhe dokumentimin ligjor të rastit. Po ashtu sqarohet se trupi i pajetë do t’i nënshtrohet ekspertizës mjekoligjore për të zbardhur plotësisht ngjarjen. /e.t
