10% e fëmijëve në arsimin 9-vjeçar kanë probleme me shikimin. Ky konstatim vjen nga depistimi i kryer në shkolla, pjesë e programit kombëtar të nisur që prej majit të vitit 2022.
Për vitin 2021–2022 janë depistuar rreth 82.799 nxënës, nga të cilët 8400 rezultojnë të jenë drejtuar për vizitë te specialisti. Ndërsa për vitin akademik 2022–2023, rreth 2422 nxënës kanë dalë me probleme me shikimin nga 20.172 depistime të kryera në total.
Megjithatë, sipas mjekëve, kjo shifër mund të jetë edhe më e lartë.
“Ky raport mund të jetë më i madh se 10%, sepse neve na rezulton se nga 10 fëmijë, 3 fëmijë rezultojnë me probleme me shikimin. Edhe po ta marrim të mirëqenë që mesatarja është 10%, kjo shifër është shqetësuese. Ka faktorë ambientalë, të ndryshimit të stilit të jetesës, të qëndrimit të gjatë në ambiente të mbyllura, në pajisje digjitale, përpara TV-së, që ka ndikuar të rriten këto shifra dhe të arrijnë në këto nivele”, u shpreh Rubin Topi, mjek okulist.
Sipas mjekut okulist Rubin Topi, miopia po kthehet në një pandemi globale.
“Kjo po kthehet në një pandemi, pra pandemia e miopisë, një rritje progresive në numrin e fëmijëve po kthehet në një problem global. Më shumë se gjysma e popullatës, deri në vitin 2050, do të vuajë nga probleme të miopisë”, tha Topi.
Topi këshillon ekspozimin sa më pak në pajisje digjitale, qëndrimin më tepër në ambiente të hapura, si dhe kontrolle të vazhdueshme për kapjen në kohë të problematikave me shikimin./E.S
