Ministri i Sigurisë Kombëtare i Izraelit, i krahut të djathtë ekstrem, Itamar Ben-Gvir, iu drejtua një turme të madhe pjesëmarrëse në marshimin kontrovers të Ditës së Jerusalemit në Jerusalemin Lindor të pushtuar.
Duke folur për luftën e Izraelit në Rripin e Gazës, Ben-Gvir tha: “Kjo fitore duhet të çohet gjithnjë e më tej, ne do të hyjmë në Gaza dhe do të triumfojmë”, raportoi The Times of Israel.
Ben-Gvir tha gjithashtu se kishte shprehur kundërshtimet e tij ndaj Izraelit për heqjen e bllokadës totale ndaj ushqimit që hyn në Rripin e Gazës ndërsa ka shtuar se armiqtë meritojnë vetëm vdekjen.
“I them kryeministrit: I dashur kryeministër, nuk duhet t’u japim ndihmë humanitare. Nuk duhet t’u japim karburant…Armiqtë tanë meritojnë vetëm një plumb në kokë!”
Ministri izraelit i financave iu drejtua gjithashtu turmës prej mijëra vetash, duke thënë: “A po e popullojmë tokën e Izraelit? A po e çlirojmë Gazën?” mes brohoritjeve miratuese.
Sipas The Times of Israel dhjetëra mijëra festues sionistë mbushën rrugicat e Qytetit të Vjetër të Jerusalemit të hënën, duke kënduar refrene anti-arabe ndërsa parakaluan drejt Murit Perëndimor për të festuar Ditën e Jerusalemit.
Ata mund të dëgjoheshin duke brohoritur “vdekje arabëve” dhe duke kënduar “u digjet fshati juaj”, ndërsa festonin rreth Jerusalemit për të shënuar ribashkimin e qytetit pas fitores së Izraelit në Luftën Gjashtëditore të vitit 1967.
Përpara marshimit, një grup aktivistësh të krahut të djathtë u mblodhën jashtë Portës së Damaskut për të zbuluar një banderolë të madhe ku shkruhej: “Pa një Nakba, nuk ka fitore!”
Nakba, ose katastrofa, është emri arab për eksodin e qindra mijëra palestinezëve që ose lanë shtëpitë e tyre ose u dëbuan në fund të viteve 1940./e.t
