Bashkia e Tiranës ka miratuar sot mbi 1,100 kredi të buta për familjet dhe çiftet e reja që nuk kanë mundësi të blejnë një banesë sipas kushteve të tregut. Ky vendim vjen si pjesë e një programi strehimi që synon të mbështesë qytetarët me të ardhura të ulëta ose të mesme.
Sipas të dhënave zyrtare, deri më tani janë dhënë 3651 kredi të buta, ndërsa me miratimin e sotëm ky numër rritet ndjeshëm. Përfituesit përfshijnë familje të reja, çifte të sapomartuara dhe individë që kanë nevojë për mbështetje për të siguruar një strehë të qëndrueshme.
Përveç kredive të buta, bashkia ka shpërndarë 2057 bonuse strehimi dhe ka vënë në dispozicion 419 banesa sociale me qira për familjet që nuk kanë mundësi të tjera strehimi.
Masat e strehimit janë pjesë e një pakete më të gjerë sociale, e cila përfshin gjithashtu abonenë falas në transportin publik për pensionistët dhe studentët, si dhe subvencionimin e 50% të tarifës së konviktit për studentët që studiojnë larg shtëpisë. m.p.
