Në një goditje të rëndësishme ndaj krimit të organizuar ndërkombëtar, autoritetet shqiptare, në bashkëpunim të ngushtë me agjencitë e zbatimit të ligjit nga Belgjika, Franca, Gjermania, Italia dhe Holanda, arrestuan dhjetë anëtarë të dyshuar të një rrjeti të fuqishëm të krimit të organizuar shqiptar, të përfshirë në trafikimin masiv të kokainës dhe pastrimin e parave.
Operacioni, i zhvilluar gjatë dy ditëve të para të gushtit, u mbështet nga ekspertiza dhe kapacitetet e inteligjencës së Europolit, i cili ka dhënë edhe detaje të shumta rreth rastit. Hetimet zbuluan aktivitetet e gjera kriminale të rrjetit, përfshirë trafikimin e dërgesave me tonelata kokainë nga Amerika Latine drejt porteve kryesore evropiane si Hamburg dhe Roterdam.
Një hap i rëndësishëm në hetim erdhi nga analiza e komunikimeve të enkriptuara të kapura përmes platformës Sky ECC, e cila u mbyll në vitin 2021. Megjithatë, të dhënat nga kjo platformë vazhdojnë të ofrojnë informacione kyçe për strukturat dhe aktivitetet e grupeve kriminale të organizuara.
Sekuestrime dhe arrestime të mëdha
Bastisjet e koordinuara, të mbështetura nga 15 urdhra kërkimi, sollën sekuestrimin e pasurive të konsiderueshme përfshirë një resort turistik, vila të shumta, apartamente, parcele toke, automjete dhe aksione në kompani. Vlera e këtyre pasurive arrin në miliona euro, duke treguar përmasat financiare të këtij organizate kriminale. Për më tepër, u sekuestruan mbi 120 mijë euro në monedha të ndryshme.
Të arrestuarit dyshohen për rolet kyçe në transportimin dhe shpërndarjen e kokainës, si dhe për pastrimin e parave përmes investimeve në biznese legjitime në Shqipëri dhe vende të tjera evropiane.
Personi kryesor i dyshuar
Mes të arrestuarve është edhe kreu i organizatës, i dënuar më parë në mungesë nga një gjykatë italiane me 21 vite burg për vepra penale si vrasje, mbajtje të paligjshme të eksplozivëve dhe pengim të drejtësisë. Ky individ organizonte dërgesat e kokainës dhe aktivitetet e pastrimit të parave nga distanca, duke përdorur komunikime të enkriptuara për t’i shpëtuar kapjes.
Një nga dërgesat më të mëdha të hetuara solli mbi 40 milionë dollarë fitim për këtë rrjet kriminal, duke treguar peshën e madhe të operacioneve të trafikut të drogës.
Një model bashkëpunimi ndërkombëtar
Shkatërrimi i këtij rrjeti kriminal nënvizon rëndësinë e bashkëpunimit ndërkombëtar. Agjencitë e zbatimit të ligjit nga gjashtë vende punuan ngushtë me Europolin për të shkëmbyer inteligjencë, analizuar të dhëna dhe koordinuar aktivitetet operative. Europoli gjithashtu dërgoi ekspertë në Shqipëri për të ofruar mbështetje gjatë operacionit.
Ky rast tregon fuqinë e policimit të bazuar në të dhëna dhe ndikimin e qëndrueshëm të mbylljes së platformave të komunikimit të enkriptuara si Sky ECC. Ai gjithashtu nënvizon sfidat e vazhdueshme që paraqesin grupet e sofistikuara kriminale me ndikim global dhe portofol të gjerë kriminal./e.t
