Last Updated on 13/11/2025 by Monika
Operacioni më i madh dhe më vdekjeprurës i policisë në historinë e Brazilit, i zhvilluar më 28 tetor në Rio de Janeiro, ka lënë pas 121 të vrarë, mes tyre katër oficerë policie. Megjithëse autoritetet e shtetit e kanë cilësuar ndërhyrjen si një “sukses”, detaje të reja kanë ngritur dyshime mbi efektivitetin dhe qëllimin real të operacionit.
Guvernatori i Rio de Janeiros, Claudio Castro, publikoi pamje të mbi 100 armëve të sekuestruara, duke e quajtur ndërhyrjen një goditje ndaj grupit të fuqishëm kriminal Comando Vermelho (Komanda e Kuqe). Por organizatat e të drejtave të njeriut e kanë dënuar ashpër aksionin, duke e cilësuar si “masakër” për shkak të numrit të lartë të viktimave dhe brutalitetit të raportuar nga dëshmitarët.
Operacioni, që përfshiu 2,500 efektivë në lagjet e varfra Alemão dhe Penha, kishte për qëllim arrestimin e dhjetëra anëtarëve të grupit kriminal. Megjithatë, hetimet e mediave vendase dhe të BBC Brasil zbuluan se asnjë prej personave të vrarë nuk ndodhej në listën zyrtare të të kërkuarve nga prokuroria.
Banorët e zonës thanë se situata nuk ka ndryshuar dhe se kontrolli i bandës mbi komunitetet vazhdon. Comando Vermelho ushtron pushtet përmes frikës, duke kontrolluar jo vetëm tregtinë e drogës, por edhe shërbimet bazë si transporti, interneti dhe furnizimi me gaz.
Ndërkohë, presidenti Luiz Inácio Lula da Silva ka urdhëruar një hetim federal mbi operacionin, ndërsa guvernatori Castro ka paralajmëruar se aksione të tjera të ngjashme do të vijojnë.
Sipas një sondazhi të AtlasIntel, mbështetja për Castro-n është rritur pas ndërhyrjes, duke tejkaluar edhe atë të presidentit Lula – një zhvillim që ka ndezur debatin kombëtar mbi mënyrën se si duhet trajtuar krimi i organizuar në Brazil./ MXH