Nga Claudia Fascia
Më 23 nëntor — ose më me gjasë më 30 — në edicionin e lajmeve të orës 13:30 në Tg1, Carlo Conti do të zbulojë emrat (dhe numrin, që mund të rritet në 30 nga 26 të përcaktuar në rregullore) të pjesëmarrësve të mëdhenj që do të ngjiten në skenën e Festivalit të Sanremos (24–28 shkurt 2026). Si çdo vit, qarkullojnë thashetheme, parashikime dhe jo rrallë fantazi rreth atyre që mund të jenë në garë, me lista shumë më të gjata sesa vendet e disponueshme.
Për drejtorin artistik është një punë e ndërlikuar, pasi ai vazhdon të marrë propozime deri në minutën e fundit (17 nëntori është afati i dorëzimit të këngëve).
Shumë këngëtare po provojnë të sigurojnë një vend, shumë të rinj gjithashtu, ndërsa disa kantautorë dhe grupe muzikore pothuajse mungojnë në parashikime. Ndër emrat më të përfolur është California, ish-anëtarja e dyshes Coma_Cose, e cila — pas ndarjes nga bashkëshorti dhe partneri i saj artistik Fausto Lama — thuhet se po përgatitet për një karrierë solo.
Të dy së bashku kanë performuar gjithmonë mirë në skenën e Aristonit. Ndër artistet veterane, Patty Pravo mbetet një opsion i mundshëm. Angelina Mango, e cila sapo publikoi një album vetëm në format dixhital — potencialisht një pararendës i një versioni fizik në shkurt — mund të ketë gjetur motivimin për t’u rikthyer në Sanremo pas pauzës që pasoi fitoren e saj të vitit 2024. Edhe Levante, Arisa dhe Malika Ayane raportohet se i kanë dorëzuar propozimet e tyre Carlo Contit, ashtu si edhe Serena Brancale, pas paraqitjes së suksesshme të vitit të kaluar. Ndër kandidatet e tjera të mundshme përmenden Sarah Toscano, si dhe debutuese të mundshme në kategorinë e “të mëdhenjve” si Emma Nolde dhe kantautorja napolitane La Nina. Po ashtu qarkullojnë emrat e Emma-s, Madame-s, Francesca Michielin, Anna Tatangelo dhe Amara-s. Më pak e mundshme duket pjesëmarrja e Elodie-s.
Repi nuk pritet të mungojë, pasi ka fituar terren vitet e fundit dhe është vendosur fort edhe në Riviera. Tedua duket pothuajse i garantuar, ndërsa përmenden gjithashtu Chiello, Luchè, Rancore dhe Clementino. Në garë është edhe shumë i riu Kid Yugi. Më e vështirë — por jo e pamundur — duket pjesëmarrja e Geolier dhe Lazza, megjithëse të dy lanë gjurmë në edicionet ku morën pjesë. Dueti Fedez – Marco Masini përmendet më shumë si spekulim sesa paralajmërim i vërtetë, pas performancës së tyre të suksesshme në natën e kopertinave vitin e kaluar. Bresh, i cili u prit mirë shkurtin e kaluar, dëshiron të provojë sërish, ashtu si Settembre, fitues në kategorinë Artistë të Rinj.
Çdo vit përflitet një kthim i mundshëm i Tommaso Paradiso-s, dhe ndoshta këtë herë mund të jetë momenti i duhur — veçanërisht me nisjen e turneut të tij në arena në pranverë, njësoj si Fulminacci. Ndër kantautorët, një rikthim po synon edhe Ermal Meta, që mungon në Sanremo që nga viti 2021. Ndërkohë, Fabrizio Moro duket të jetë distancuar, duke deklaruar: “Festivali po bëhet gjithnjë e më shumë një shfaqje televizive sesa një konkurs këngësh, dhe kjo më tremb.” Të mundshëm janë edhe rikthimet e Tananai-t, Diodato-s, si dhe Blanco-s, i cili shkaktoi polemika në vitin 2023 për dëmtimin e skenës, por më pas u rikthye në edicionin e kaluar si kompozitor — dhe thuhet se është gati të rivendosë reputacionin e tij.
Daniele Silvestri — aktualisht jo në mesin e kandidatëve — mund të shfaqet si surprizë e minutës së fundit. Venerus përmendet si një autsajder i mundshëm, njësoj si Lucio Corsi. Edhe Sal da Vinci mbetet në lojë.
Siç vihet re, grupet mungojnë ende. Pas njoftimit të ribashkimit, mund të provojnë sërish Litfiba? A do të rikthehen në skenë Subsonica? Zero Assoluto e ka dorëzuar tashmë këngën e tyre, dhe ka gjasa që të njëjtën ta kenë bërë edhe Benji & Fede, të cilët u lanë jashtë vitin e kaluar.
Në këtë mozaik të ndërlikuar zgjedhjesh, ende mungojnë emrat e atyre që do t’i bashkohen Contit në skenë. Më herët është përfolur për Giorgia-n, e cila pas përfundimit të angazhimeve në X Factor në dhjetor, mund të udhëtojë drejt Sanremos — ndoshta e shoqëruar nga Achille Lauro, që kërkon revansh pas moskualifikimit në pesëshen finale vitin e kaluar. Prej vitesh pritet edhe një ardhje e Laura Pausinit.
Burimi: ansa.it/ Përgatiti për botim: L.Veizi