Ukraina thuhet se ka rënë dakord mbi kornizën e një marrëveshjeje paqeje të ndërmjetësuar nga Shtetet e Bashkuara, një hap i rëndësishëm që mund të çojë drejt përfundimit të luftës gati katërvjeçare.
Sipas raportimeve, marrëveshja e rishikuar është pranuar gjatë bisedimeve të zhvilluara të martën në Abu Dhabi mes zyrtarëve amerikanë dhe një delegacioni ukrainas. Në kryeqytetin e Emirateve të Bashkuara Arabe ndodhej edhe një delegacion rus, megjithëse nuk dihet nëse janë zhvilluar bisedime të përbashkëta.
Lajmet dolën fillimisht në qarkullim kur një zyrtar i paidentifikuar amerikan i tha ABC News se kishin mbetur vetëm “disa detaje të vogla” për t’u zgjidhur, por se “ukrainasit kanë pranuar marrëveshjen e paqes.”
Një zyrtar ukrainas i tha Reuters se Kievi mbështet “thelbin” e kornizës së marrëveshjes, pas bisedimeve të fundjavës së kaluar në Gjenevë. Ai shtoi se “çështjet më të ndjeshme” do të diskutohen drejtpërdrejt mes Presidentit ukrainas Volodymyr Zelenskyy dhe Presidentit amerikan Donald Trump.
As Rusia dhe as Ukraina nuk kanë komentuar publikisht deri tani mbi marrëveshjen, ndërsa CNBC nuk ishte në gjendje të verifikonte raportimet e ABC News dhe Reuters.
Nga ana tjetër, nuk dihet nëse Moska do të pranojë versionin e rishikuar të marrëveshjes. Zëdhënësi i Kremlinit, Dmitry Peskov, tha se “nuk ka asgjë për të deklaruar” dhe se Rusia po monitoron raportimet mediatike. Ai konfirmoi se e kupton që “negociatat mes amerikanëve dhe ukrainasve po vazhdojnë” dhe se teksti i marrëveshjes ka pësuar ndryshime, por se Moska ende nuk ka marrë informacion zyrtar.
Presioni mbi Kievin dhe planet e rishikuara
Ukraina është përballur me presion të madh ditët e fundit për të pranuar një plan paqeje, pasi u zbulua se SHBA dhe Rusia kishin zhvilluar bisedime të fshehta dhe kishin hartuar një plan prej 28 pikash, i cili në pjesën më të madhe i përshtatej kërkesave ruse.
Plani përfshinte kushte të diskutueshme, si dorëzimi i rajonit të Donbasit nën kontroll rus, zvogëlimi i ushtrisë ukrainase me 50% dhe propozime të tjera që tejkalonin “vijat e kuqe” të Ukrainës.
Fillimisht, presidenti Zelenskyy dhe aleatët europianë reaguan me heshtje të thellë ndaj planit, i cili nga analistët u konsiderua si një kapitullim përballë kërkesave maksimale të Moskës. Presidenti amerikan Donald Trump i dha Kievit ultimatum që t’i përgjigjej planit deri të enjten, ndërsa Presidenti rus Vladimir Putin e përshëndeti atë duke e quajtur “bazë për një marrëveshje përfundimtare paqeje.”
Duke thyer heshtjen të premten e kaluar, Zelenskyy e përshkroi situatën si një nga momentet më të vështira të historisë së Ukrainës, duke thënë se vendi po përballet me zgjedhjen mes “humbjes së dinjitetit ose humbjes së një partneri kyç,” duke iu referuar SHBA-ve./mxh