Të dy në kastin e “The Estate”, rreth krizës së një familjeje aristokratike
Francesco Gallo
Një familje e tërë artistësh është sot në Festivalin e Filmit në Torino për trillerin The Estate, me regji nga Carlo Gabriel Nero, me protagonistë nënën e tij, Vanessa Redgrave, 88 vjeç, dhe babain e tij, Franco Nero, 83 vjeç.
Në qendër të filmit është historia e familjes aristokrate angleze Wellsley, e mbingarkuar nga borxhe të pakapërcyeshme dhe në prag të humbjes së pronës shekullore.
Ndërsa anëtarët e kësaj familjeje përpiqen të gjejnë një zgjidhje, një sërë ngjarjesh misterioze fillojnë të zhvillohen, duke i detyruar Wellsley-t të përballen me padrejtësitë e thella që ata – dhe pronarë të tjerë tokash, të së kaluarës dhe të së tashmes – kanë kryer.
Franco Nero interpreton kamerierin, ndërsa Redgrave është kreu i familjes aristokratike.
“Unë jam kamerieri që e shoqëron këtë zonjë aristokrate kudo,” thotë ai në Torino, duke iu drejtuar Redgrave, e cila mbërriti me karrocë me rrota. “Jam njeriu i ditur i historisë; flas pak, por ato pak gjëra që them, i them mirë.”
Regjisori shpjegon: “Qëllimi im ishte të krijoja një dramë familjare komplekse me implikime universale; pra, të tregoja diçka më shumë sesa thjesht historinë e një familjeje aristokrate që përpiqet të shpëtojë shtëpinë.”
“Filmi shkon më tej,” vijon ai, “duke trajtuar padrejtësitë e thella socioekonomike me të cilat përballet bota sot, dhe ofron një zgjidhje që lidhet me idetë e shkencëtarit social amerikan të shekullit XIX, Henry George, si edhe me ekonomistin bashkëkohor Fred Harrison, producent i asociuar i filmit.”
Që kjo teori ekonomike është në qendër të filmit u bë e qartë edhe gjatë konferencës për shtyp, e cila u dominua nga vetë Fred Harrison, i ftuar në Torino dhe i lejuar me bujari të madhe nga regjisori të shpjegonte pikëpamjet e tij.
Harrison argumenton se një “varësi e tepërt” nga toka, prona dhe hipotekat e bën ekonominë të prekshme ndaj krizave sistemike. “Paraliza politike që ka goditur prej kohësh Evropën vjen nga fakti se askush nuk di si t’i zgjidhë këto probleme. Filmi, në një farë mënyre, përpiqet ta thyejë këtë paralizë,” thotë ai.
Vanessa Redgrave shprehet shkurt — me një zë shumë të ulët: “Ishte shumë bukur të punoja me djalin tim.” Ajo do të vlerësohet me Çmimin Special Fondazione CRT 43TFF.
Në fund, Franco Nero kujton me humor një episod me Paul Newman:
“ Në vitin 1979, Vanessa, që priste Carlion, më çoi në një festë të mbushur me yje të Hollivudit. Në një moment, ndjeva një trokitje në shpatull: u ktheva dhe pashë Paul Newman, i cili — për turpin tim të madh — më kërkoi një autograf për vajzën e tij.”
Në film luajnë gjithashtu: Jennifer Wiltsie, Bob Barrett, Julian Rivett, Julian Firth, Andrew Buzzeo, Barbara Leon, Lillian Nero, Paul Hilton, Phoebe Marshall, Jonny Lavell, Tom Chapman, Susanna Dalcielo dhe Imman Zaffrani.
Burimi: ansa.it/ Përgatiti për botim: L.Veizi