Deputeti i Partisë Demokratike, Luan Baçi, e ka komentuar protestën e 22 dhjetorit me fjalë që në 2011 i përmendnin socialistët para “Demonstratës” së tyre.
Sipas tij, nuk dihet se kur do të përfundojë. Komentet Baçi i bëri në ‘Ditari i Pasdites’ me gazetarin Pandi Gjata në A2 CNN, ku tha se qeveria e kryeministrit Edi Rama rrëzohet vetëm përmes protestave.
Ai tha gjithashtu se do të jetë populli opozitar ai që do të vendosë edhe mënyrën e zhvillimit të protestës së PD-së në datën 22 dhjetor.
“Duhet të ketë protesta në Parlament, ashtu siç u protestua sot. Ashtu duhet të protestohet në çdo rrugë e çdo lagje. Ne kemi vendin tonë në Parlament, karriget atje janë të popullit opozitar dhe nuk na i heq dot Rama. Nisja e protestës dihet, në orën 18:00, por përfundimi asnjëherë nuk dihet, as mënyra si do të zhvillohet protesta.
Në fund fare duhet të kemi parasysh një gjë, kur ka protestë, pushteti është në duart e popullit opozitar. Ditën që përcaktohet orari dhe vendi i protestës, pushteti kalon në duart e popullit opozitar. Nuk e dimë atë, do të mbahen fjalime apo nuk do të mbahen. Ajo mund të vendoset nga populli opozitar në ditën e protestës”, tha mes të tjerash Baçi.
Pra, “në dorë e ka populli”, që dmth nuk parashikohet asgjë që do të ndodhë më 22 dhjetor. M.P.